İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 206 Hüküm no: 234 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Mustafa’nın vefât eden eşi Ayşe bt. Ahmed ile oğlu Süleyman’ın terekesinden Hasan Çelebi b. İbrahim’de emaneten bulunan meblağı teslim aldığı Mahmiye-i İstanbul’da Sultan Bâyezid-i Cedid mahallesinde sâkine iken bundan akdem vefât eden Âişe bt. Ahmed Beşe nâm hâtûnun verâseti zevc-i metrûku Mehmed Çelebi b. Mustafa b. Mehmed’e ve vâlidesi Râbia bt. Oruç Dede ve babası mezbûr Mehmed Beşe b. Mustafa’ya ve sagīr oğlu Süleyman’a münhasıra olup ba‘dehâ sagīr-i mezbûr Süleyman dahi fevt olup verâseti babası mezbûr Mehmed Çelebi ve ceddesi mezbûre Râbia Hâtûn’a münhasıra olduğu mütehakkık oldukdan sonra zevc-i merkūm Mehmed Çelebi tarafından müteveffât-ı mezbûre Âişe ve oğlu sagīr-i mezbûr Süleyman’ın terekelerinden kendüye isâbet eden hisselerini ve sâir zimem-i nâsda olan hukukunu taleb ve da‘vâ ve ahz u kabza ve kendüye îsâle ve kabz u îsâl mütevakkıf olduğu umûrun cümlesine vekîl olduğu yedinde olup mazmûnu Mehmed Çelebi b. Abdi ve Halil b. Abdullah şehâdetleriyle müsbet olan hükm hücceti ile sâbit ve sübût-ı vekâletine hükm-i şer‘î lâhık olan babası mezbûr Mustafa b. Mahmud meclis-i şer‘-i şerîf-i enverde mahmiye-i mezbûrede Nerdübanlı Mescid mahallesinde sâkine işbu bâ‘isetü’l-kitâb Hasan Çelebi b. İbrahim mahzarında bi’l-vekâle ikrâr-ı tâm ve takrîr-i kelâm edip müteveffât-ı mezbûre Âişe Hatun fevt oldukda oğlum müvekkil-i merkūm Mehmed Çelebi hâzır bulunmamağla mezbûrenin ve oğlu sagīr-i mezbûr Süleyman’ın terekelerinden kendüye âid olan hisse-i irsiyelerinden işbu defter-i kassâm nâtık olduğu üzere ba‘de ihrâci’l-mehri’l-müeccel ve sâirü’l-ihrâcât üç bin dokuz yüz otuz altı akçe bi-tarîki’l-emâne taraf-ı şer‘-i şerîfden merkūm Hasan Çelebi’ye def‘ u teslîm olunmuşdu. Hâlâ ben vekâlet-i müsbetem hasebiyle meblağ-ı mezbûru merkūm Hasan Çelebi’den taleb ve da‘vâ müvekkilim için bana teslîmine tenbîh-i şer‘î dahi lâhık oldukdan sonra merkūm Hasan Çelebi meblağ-ı mezbûr üç bin dokuz yüz otuz altı akçeyi bana def‘ u teslîm ben dahi yedinden tamâmen ahz u kabz eyledim, ba‘de’l-yevm merkūm Hasan Çelebi yedinde ve kıbelinde bir akçe ve bir habbe bâkī kalmamışdır dedikde gıbbe’t-tasdîki’l-mu‘teber mâ-hüve’l-vâkı‘ bi’t-taleb ketb olundu. Fi’l-yevmi’r-râbi‘ min-Saferi’l-hayr li-sene mi’e ve elf. Şuhûdü’l-hâl: Çukadâr el-Hâc Süleyman Beşe b. Abdi, İbrahim Çelebi b. Ahmed, el-Hâc Ali b. Mehmed, Ahmed Çelebi b. Abdi.