İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 206 Hüküm no: 235 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakoret bt. Yani’nin saman bedelinden dolayı alacağı olduğunu iddia ettiği Panayot v. Nikola ile anlaşması Mahmiye-i İstanbul’da Aksaray kurbünde Bakoret bt. Yani nâm nasrâniye ba‘de’t-ta‘rîf meclis-i şer‘-i şerîf-i enverde Panayot v. Nikola nâm zimmî muvâcehesinde ikrâr ve takrîr-i kelâm edip saman semeninden mezbûr Panayot zimmetinde yedimden iştirâ ve kabz eylediği beynimizde vezni ma‘lûm yirmi guruş hakkım olup meblağ-ı mezbûru bundan akdem taleb ve da‘vâ eylediğimde ol dahi inkâr etmekle beynimizde münâza‘ât-ı kesîre ve muhâsamât-ı şedîde cereyânından sonra muslihûn tavassut edip mezbûr Panayot benimle on esedî guruş üzerine sulh oldukda ben dahi sulh-ı mezbûru kabûl ve bedeli olan meblağ-ı mezbûr on guruşu mezbûrun yedinden tamâmen ahz u kabz edip ba‘de’l-yevm husûs-ı mezkûra ve ziyâdeye medyûn-ı mezbûrun zimmetini ibrâ-i âmm-ı kātı‘u’n-nizâ‘la ibrâ vü ıskāt edip ol dahi yedimde bedel deyü verdiği meblağ-ı mezbûr on guruşa müte‘allika da‘vâdan benim zimmetimi ibrâ vü ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-sâdis min-Saferi’l-hayr li-sene mi’e ve elf Şuhûdü’l-hâl: Mustafa Efendi [b.] el-Hâc Ali, Süleyman Efendi b. Ali, İbrahim Çelebi b. ( ).