İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 207 Hüküm no: 236 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râziye bt. Abdullah’ın İstanbul’da Keçeci Piri mahallesinde sahibi olduğu evi eşi Abdi Çelebi b. Musa’ya satması Mahmiye-i İstanbul’da Keçeci Piri mahallesinde sâkine Râzıye bt. Abdullah nâm hatun tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân Abdurrahim Efendi b. Hüseyin Efendi ve Mahmud Çelebi b. Musli nâm kimesneler şehâdetleriyle şer‘an sâbit olan el-Hâc Mustafa b. Ömer nâm kimesne meclis-i şer‘-i şerîf-i enverde müvekkilem mezbûrenin zevc-i dâhili bâ‘is-i hâze’l-kitâb Abdi Çelebi b. Musa nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Raziye Hatun akd-i âti’z-zikrin sudûruna değin silk-i mülkünde münselik olup mahalle-i mezbûrda vâki‘ bir tarafdan merhûm Hüseyin Efendi ve bir tarafdan mersûme Hâce Hatun mülkü ve bir tarafdan Uzun Sadioğlu Bostanı ve bir tarafdan tarîk-i âm ile mahdûd iki bâb tahtânî oda ve bi’r-i mâ’ ve bir kenîf ve bir tahta havluyu müştemil mülk menzilini cümle-i tevâbi‘ ve levâhıkı ile ve kâffe-i hukūk ve merâfıkı ile zevci mezbûr Abdi Çelebi’ye yüz kıt‘a esedî guruşa bey‘ ve teslîm ol dahi ber-vech-i iştirâ ve tesellüm ve kabz u kabûl etdikden sonra semeni olan meblağ-ı mezbûr yüz guruşa müvekkilem mezbûre Râziye Hatun zevci mezbûr Abdi Çelebi yedinden tamâmen ahz u kabz eyledi, ba‘de’l-yevm menzil-i mahdûd-ı mezkûr mezbûr Abdi Çelebi’nin mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-hâmis aşer min-Saferi’l-hayr li-sene mi’e ve elf. Şuhûdü’l-hâl: Mehmed Efendi b. ( ) el-İmâm, Mehmed Çelebi b. ( ) el-Müezzin, İbrahim Çelebi b. el-Hâc Mustafa, el-Hâc Hüseyin [b] İbrahim, Fincancı Ali Çelebi, Süleyman Çelebi b. Hüseyin, Hüseyin Çelebi b. Hasan, Masarcı? İbrahim Çelebi.