İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 208 Hüküm no: 237 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mustafa’nın eşi Hüseyin Beşe b. Abdurrahman’dan muhalaa yoluyla boşanması Hazret-i Ebî Eyyûb el-Ensârî muzâfâtından Vidoz nâm karye[de] sâkine Rukiye bt. Mustafa nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân Süleyman b. Resul ve Resul b. İbrahim nâm kimesneler şehâdetleriyle şer‘an sâbit olan Veli Efendi b. Kemal meclis-i şer‘-i şerîf-i enver ve mahfil-i dîn-i münîf-i ezherde mezbûre Rukiye’nin zevc-i dâhili bâ‘is-i hâze’l-kitâb Hüseyin Beşe b. Abdurrahman mahzarında bi’l-vekâle ikrâr ve takrîr-i kelâm edip müvekkilem mezbûrenin zevci mezbûr Hüseyin Beşe ile beynlerinde hüsn-i zindegâneleri olmamağla zimmetinde mütekarrir beş bin akçe mehr-i müecceli ve nafaka-i iddet-i mu‘ayyeneleri üzerlerinde ve me’ûnet-i süknâsı ve yedinde def‘ u teslîm eyledi[ği] nakid sekiz guruş ve bir kırmızı ferace dahi bedel-i hul‘ olmak üzere zevci mezbûr ile muhâla‘a-i sahîha-i şer‘iyye ile muhâla‘a olup ol dahi ber-vech-i muharrer hul‘-ı mezbûru kabûl etdikden sonra hukuk-ı zevciyyete ve sâire müte‘allika âmme-i da‘vâdan her biri âharın zimmetini ibrâ-i âmm-ı kātı‘u’n-nizâ‘la ibrâ vü ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâlis aşer min-Saferi’l-hayr li-sene mi’e ve elf. Şuhûdü’l-hâl: Sıvacı Mehmed, İbrahim Çelebi b. Ahmed, Siyavuş b. Ahmed, İsmail b. Mustafa.