İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 208 Hüküm no: 238 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Abdullah’ın, vefât eden Fincancı Acem Ali b. Saruhan’ın azatlı kölesi İvaz b. Abdullah aleyhindeki kölelik iddiasının reddedilmesi Tüccârdan olup mahrûse-i Edirne’de Yenihan’da müsâferet vechi üzere sâkin iken bundan akdem vefât eden Fincancı Acem Ali b. Saruhan b. Abdullah’ın mu‘takası ve kendiden sonra müte‘âkib vefât eden sulbî oğlu Mehmed’in ve sagīre kızları Âişe ve Mümine’nin vâlideleri ve hasran vâriseleri olan Fâtıma bt. Abdullah nâm hatun meclis-i şer‘-i şerîfde işbu orta boylu, açık kaşlı, elâ gözlü bıyıklı Rusiyyü’l-asl bâ‘is-i hâze’l-kitâb İvaz b. Abdullah nâm mevsûf mahzarında üzerine da‘vâ ve takrîr-i kelâm edip mezbûr İvaz müteveffâ-yı mezbûr Acem Ali’nin hayâtında abd-i memlûku olup ba‘de vefâtihî sıgâr-ı mezbûrûna ba‘dehüm irsen bana isâbet etmekle hâlâ mezbûr İvaz mülk-i mevrûsum olmuş iken bana rıkka inkiyâddan imtinâ‘ eder, suâl olunup ihkāk-ı hak olunmak matlûbumdur dedikde gıbbe’s-suâl mevsûf-ı mezbûr İvaz cevâbında fi’l-hakīka ben müteveffâ-yı mezbûr Acem Ali’nin hayâtında abd-i memlûku olduğum hâlde târîh-i kitâbdan altı sene mukaddem [50b] beni mâlından tahrîr ve i‘tâk edip ben sâir ahrâr-ı asliyyîn gibi hür olmuşdum, el-ân müdde‘iye-i mezbûreyi def‘le mukābele edicek gıbbe’l-istintâk ve’l-inkâr mevsûf-ı mezbûrdan def‘-i mezbûrunu mübeyyin beyyine taleb olundukda mahmiyye-i İstanbul’da Tahtahan’da sâkin Kara Mehmed b. Ahmed ve Ali Paşa mahallesinde sâkin Yusuf b. Abdullah ve Beşiktaş kasabasında Sinan Paşa mahallesinde sâkin Ali Çelebi b. Hüseyin nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müteveffâ-yı mezbûr Acem Ali b. Saruhan b. Abdullah’ın hayâtında işbu mevsûf-ı mezbûr yedinde mülkü olduğu hâlde târîh-i kitâbdan altı sene mukaddem bizim huzûrumuzda mâlından tahrîr ve i‘tâk ve zümre-i ahrâr-ı asliyyîne idrâc ve ilhâk eyledi, mevsûf-ı mezbûr târîh-i mezkûrdan beri hür olmuşdur bizler bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mevsûf-ı mezbûrun ıtkına ba‘de’l-hükm müdde‘iye-i mezbûre Fâtıma Hatun bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâlis aşer min-Saferi’l-hayr li-sene mi’e ve elf. Şuhûdü’l-hâl: İbrahim Çelebi b. Ahmed, Abdurrahman b. Abdullah, Ebûbekir Çelebi b. Hüseyin, Ali Beşe b. Şaban.