İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 209 Hüküm no: 239 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. İstefan’ın kefalet meselesinden dolayı Hıristo v. Rizo aleyhindeki davasının reddedilmesi Bakkal tâifesinden olup mahmiye-i İstanbul’da Tahtakale sûkunda sâkin Yorgi v. İstefan nâm zimmî meclis-i şer‘-i şerîf-i enverde tâife-i mezbûreden işbu bâ‘isü’r-rakīm Hıristo v. Rizo nâm zimmî muvâcehesinde üzerine da‘vâ ve takrîr-i kelâm edip bundan akdem hâlik olan babam mezbûr İstefan hayâtında diğer Yorgi v. Yani nâm zimmî ile bakkallık san‘atında şerîk olmağla şerîki mezbûr diğer Yorgi yedinde olan sermâye-i ma‘lûmesinden oğlu Dimitri nâm zimmî babası gıyâbında ben sana kırk bin yüz akçe edâ eyledim bundan akdem mezbûr Dimitri bana kırk bin yüz akçe vermek üzere ta‘ahhüd etdikden sonra işbu mezbûr Hıristo mezbûr Dimitri’nin bana verecek olduğu meblağ-ı mezbûrdan bin yüz akçeye kefîl olmuşidi, hâlâ bi-hükmi’l-kefâle mezbûr Hıristo’dan taleb ederim, suâl olunsun dedikde müdde‘î-i mezbûrun takrîr-i meşrûhu üzerine mezbûr Hıristo’nun kefâleti sahîha olmamağla müdde‘î-i mezbûrun da‘vâsı mesmû‘a olmayıp mezbûr Hıristo’ya şer‘an suâl dahi teveccüh etmemeğin mûcebince müdde‘î-i mezbûr Yorgi bî-vech mu‘ârazadan men‘ olunup, mâ-vaka‘a bi’t-taleb ketb olundu. Fi’l-yevmi’t-tâsi‘ min-Saferi’l-hayr li-sene mi’e ve elf. Şuhûdü’l-hâl: İbrahim b. Ahmed, Siyavuş b. Abdi, Ebûbekir b. Hüseyin, Ali b. Bâli.