İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 210 Hüküm no: 240 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çüngüş halkından İstanbul’da Karaman civarında ikamet eden Mehmed b. Ahmed ve Halil b. Himmet’in, kendilerinden haksız yere para alan Ali Beşe b. Veli’den şikayetleri Fi’l-asl vilâyet-i Anadolu’da Diyarbekir sancağında Çüngüş kazâsına tâbi‘ Abahir? nâm karye ahâlisinden olup mahmiye-i İstanbul’da Karaman kurbünde sâkinler Mehmed b. Ahmed ve Habil b. Himmet nâm kimesneler meclis-i şer‘-i şerîf-i enverde Ali Beşe b. Veli nâm kimesne mahzarında üzerine da‘vâ ve takrîr-i kelâm edip mezbûr Ali Beşe târîh-i kitâbdan beş sene mukaddem karye-i mezbûrdan gelüp Yeniçeri serdârıyım deyü bi-gayrı hakkın yirmi beş guruşumuzu ahz u kabz etmişdi, hâlâ mezbûr Ali Beşe’ye suâl olunup alıverilmesi matlûbumuzdur dediklerinde gıbbe’s-suâl ve’l-inkâr müdde‘iyân-ı mezbûrândan müdde‘âlarına mutâbık beyyine taleb olundukda karye-i mezbûre ahâlîsinden mahmiye-i mezbûrede müsâferet vechi üzere sâkinler Üveys b. Budak ve Hasan b. Timurtaş nâm kimesneler li-ecli’ş-şahâde meclis-i şer‘a hâzırân olup isre’l-istişhâd fi’l-hakīka târîh-i mezbûrda mezbûr Ali Beşe karye-i mezbûreden gelüp yeniçeri serdârıyım deyü bizim huzûrumuzda işbu müdde‘iyân-ı mezbûrân mezbûr Mehmed ve Halil Beşe’nin yirmi beş guruşların ahz u kabz eyledi biz bu husûsa bu vech üzere şer‘an edâ-yı şehâdet ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr yirmi beş guruşu müdde‘iyân-ı mezbûrâna edâ ve teslîme mezbûr Ali’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâlis aşer min-Rebî‘ülevvel sene mi’e ve elf. Şuhûdü’l-hâl: İbrahim Çelebi b. Ahmed, Ali b. Bâli, Hüseyin b. Receb.