İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 210 Hüküm no: 241 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Haçinî? Nakkaşpaşazâde Hüseyin’in verasetinden dolayı Abdullah Bey’in, vasiler İsmail Çelebi ve Ali Reis’in zimmetini ibra etmesi Medîne-i Galata muzâfâtından kasaba-i Kasımpaşa[da] Sinan Paşa mahallesinde sâkin iken bundan akdem vefât eden Hüseyin b. Nakkaşpaşazâde Hüseyin Bey nâm sagīrin verâseti vâlide Belkis Bey Abdullah ile li-üm karındaşları Mehmed ve Mustafa ve Fâtıma evlâd-ı İsmail b. Ahmed Ağa nâm sagīrlere ve li-eb ammi Abdullah Bey b. el-merhûm Ali Bey’e münhasıra olduğu şer‘an mütehakkık oldukdan sonra merkūm Abdullah bey tarafından husûs-ı âti’l-beyâna vekîl olduğu İsmail Efendi b. Mehmed ve Mustafa Çavuş b. Mehmed şehâdetleriyle şer‘an sâbit olan sulbî oğlu Ali Bey nâm kimesne meclis-i şer‘-i şerîf-i enverde sagīr-i mezbûr Hüseyin Bey hayâtında müte‘âkiben vasiyy-i mansûbları olan Ali Reis b. Receb ve üveyi babası mezbûr İsmail b. Ahmed nâm kimesne mahzarında ikrâr-ı tâm ve takrîr-i kelâm edip mezbûr Ali Reis sagīr-i mezbûr Hüseyin’in hayâtında vasiyy-i mansûbu olup ba‘dehû vesayetden azl olunup yerine mezbûr İsmail Çelebi sagīr-i mezbûre vefâtına değin vasî nasb u ta‘yîn olunmuşdu. Hâlâ vasiyân-ı mezbûrânın cümle îrâd ve makbûzât ve masârıfları muhâsebesi şer‘an görülüp mezbûr Ali Reis cümle makbûzundan ba‘de külli hesâb babam müvekkil-i merkūm Abdullah Bey’in kendi hissesine âid dört bin akçe hakkı bâkī kalıp ve mezbûr İsmail Çelebi’nin kezâlik cümle makbûzundan ba‘de külli hesâb babamın hissesine âid beş bin akçe hakkı bâkī kalmağla meblağayn-i mezbûreyn târîh-i kitâbdan otuz gün tamâmına değin talebleriyle te’cîl ve kabûl olundukdan sonra meblağayn-i mezbûreynden mâ‘adâ müteveffâ-yı mezbûr Hüseyin Bey’in kalîl ve kesîr ve sâir ism-i mâl ıtlâk olunur terekesine ve bi’l-cümle husûs-ı mezbûra müte‘allika âmme-i de‘âvî ve mütâlebâtdan ben müvekkilim mezbûrân Ali Reis ve İsmail Çelebi’nin zimmetlerini ve mezbûrân dahi benim ve babamın zimmetimizi ve bi’l-cümle her birimiz âharın zimmetini ibrâ-i âmla ibrâ ve ıskāt eyledik, min ba‘d meblağayn-ı mezbûreteynden mâ‘adâ bir vechile da‘vâ ve nizâ‘ımız kalmamışdır dedikde gıbbe’t-tasdîki’l-vicâhî mâ-vaka‘a bi’t-taleb ketb olundu. Fi’l-yevmi’s-sâmin min-Saferi’l-hayr li-sene mi’e ve elf Şuhûdü’l-hâl: Süleyman Efendi el-İmâm, Mustafa Çelebi b. Mehmed, Mehmed b. Şaban, Mehmed Çelebi b. Zülfikar, Mehmed Çelebi b. Musa, Osman b. Hüseyin, Zülfikar b. Mehmed, Hüseyin b. Abdi, Mustafa b. Şaban, Abdurrahman b. Abdi.