İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 211 Hüküm no: 242 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Mahmud’un vefât eden Ali Ağa b. Osman’da olan alacağının varisleri Ümmühani bt. Mehmed’den tahsil etmesi Mahmiye-i İstanbul’da Üskübî mahallesinde sâkine bâ‘is-i hâze’l-kitâb Ali Çelebi b. Mahmud meclis-i şer‘-i hatîrde mahalle-i mezbûrede sâkin iken bundan akdem vefât eden Ali Ağa b. Osman nâm kimesne vâlidesinin li-ebeveyn kız karındaşı ve zât cihetinden vârisesi olan işbu râfi‘atü’l-kitâb Ümmihani bt. Mehmed nâm hatun mahzarında ikrâr ve i‘tirâf edip müteveffâ-yı mezbûr Ali Ağa zimmetinde cihet-i karz-ı şer‘îden elli beş kıt‘a esedî guruş hakkım olup kable edâ fevt olmağla tereke-i vâfiyesine vaz‘-ı yed eden Ümmihani bt. Mehmed’den taleb eylediğimde târîh-i kitâbdan on [gün] mukaddem meblağ-ı mezbûr elli beş kıt‘a esedî guruşu tereke-i vâfiyesinden tamâmen bana def‘ [ve] teslîm ben dahi ahz u kabz eyledim ba‘de’l-yevm husûs-ı mezbûre müte‘allika de‘âvi ve mütâlebâtdan mezbûreyi ibrâ eyledim dedikde gıbbe’t-tasdîk mâ-hüve’l-vâkı‘ kayd şüd. Fi’l-yevmi’s-sâdis aşer min-Saferi’l-hayr sene mi’e ve elf. [Şuhûdü’l-hâl]: Ahmed Ağa b. Abdullah, İbrahim Çelebi el-Muhzır, Mahmud Beşe el-Muhzır.