İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 212 Hüküm no: 243 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Çelebi b. Musa’nın, Dergah-ı Âli yeniçerilerinin Yirmibeşinci Cemaatine ait vakıfdan aldığı borca karşılık evini rehin etmesi Mahmiye-i İstanbul’da Keçeci Pîrî mahallesinde sâkin Abdi Çelebi b. Musa nâm kimesne meclis-i şer‘-i şerîf-i enverde Dergâh-ı âlî yeniçerilerinin yirmi beşinci cemâ‘atine mahsûs oda ahâlîsinin mühimmâtına mevkūfe nukūda bi’l-fi‘il mütevellî olan işbu bâ‘isü’l-kitâb Ahmed beşe b. Abdullah nâm kimesne mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan merhûm Hüseyin Efendi mülkü ve bir tarafdan merhûm Hâce Hatun mülkü ve bir tarafdan Uzun Sadioğlu bostanı ve bir tarafdan tarîk-i âm ile mahdûd büyût-ı adîdeyi müştemil mülk menzilimi bi-cümleti’t-tevâbi‘ ve’l-levâhık mütevellî-i mezbûra yetmiş beş guruşa bi-tarîki’l-istiğlâl bey‘ ve teslîm ol dahi ber-vech-i muharrer yedinde mâl-ı vakf-ı mezbûr ile bi’t-tevliye iştirâ ve tesellüm ve semen-i mezbûru yedinden tamâmen ahz u kabz etdiğimden sonra yine mütevelli-i mezbûr Ahmed Beşe menzil-i mahdûd-ı mezkûru gıbbe’t-tahliyeti’ş-şer‘iyye ve’t-takâbızi’l-mer‘î târîh-i kitâbdan yüz seksen bir gün tamâmına değin üç guruş ile üç rub‘ guruşa bana îcâr ve teslîm ben dahi minvâl-i muharrer üzere istîcâr ve kabûl ve kabz eyledim dedikde gıbbe’t-tasdîki’ş-şer‘î mezbûr Abdi Çelebi meclis-i şer‘de Pîrî Çelebi b. Mehmed mahzarında ikrâr u i‘tirâf edip eğer müddet-i mezkûre tamâmında vakf-ı mezbûra olan cem‘an yetmiş sekiz guruş ve üç rub‘ guruşa vakf-ı mezbûra edâ ve teslîm etmezsem menzil-i mahdûd-ı mezkûru semeni misli ile âhara bey‘ ve kabz-ı semene ve semeninden deyn-i mezbûru mütevellî-i mezbûra edâya ve fazla kalırsa bana îsâle ve bunlar mütevakkıf olduğu umûrun küllîsine mezbûr Piri Çelebi nâm kimesneyi tarafımdan azil ve in‘izâlden masûn vekâlet-i devriye ile vekîl ve nâib-i menâb nasb u ta‘yîn eylediğimde ol dahi vekâlet-i mezbûreyi kabûl ve hizmet-i lâzımesini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Saferi’l-hayr li-sene mi’e ve elf. Şuhûdü’l-hâl: İplikçi İbrahim Beşe b. Bâli, Odayazıcı İbrahim Efendi, Hüseyin Odabaşı b. ( ), Şaban Beşe b. ( ) İsmail Beşe b. ( ), Süleyman Efendi b. Veli, Emir Ali Çelebi b. ( ).