İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 212 Hüküm no: 244 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun bt. Ahmed’in, Rabia Hatun bt. Abdullah’dan almış olduğu borç karşılığında evini rehin vermesi Mahmiye-i İstanbul’da merhûm ve mağfûrün-leh Ebu’l-feth ve’l-megāzî Sultan Mehmed Hân-ı Gazî câmi‘-i şerîfi kurbünde Hâce Mustafa mahallesi sâkinelerinden olup zâtı ma‘rifet-i şer‘iyye ile ârifân Abdurrahman Çelebi b. Sefer ve Hüseyin b. Mustafa ta‘rîfleriyle mu‘arrefe olan Fâtıma Hatun bt. Ahmed meclis-i şer‘-i şerîf-i enverde râfi‘at-i hâze’l-kitâb Râbia Hatun bt. Abdullah’ın zevci ve tarafından husûs-ı âti’z-zikri tasdîka sâbitü’l-vekâle vekili olan Sefer Efendi b. Mehmed mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Ahmed Efendi menzili ve bir tarafdan Hoca Mustafa Vakfı olan odalar ve bir tarafdan tarîk-i hâs ve bir tarafdan tarîk-i âm ile mahdûd büyût-ı adîdeyi müştemil mülk menzilimi bi-cümleti’t-tevâbi‘ ve’l-levâfık ve kâffeti’l-hukūk ve’l-merâfık mezbûre Râbia Hâtûn’a bi-tarîki’l-istiğlâl yetmiş guruşa bey‘ ve teslîm ol dahi iştirâ ve tesellüm edip semeni olan meblağ-ı mezbûr yetmiş guruşu yedinden tamâmen ahz u kabz eylediğimden sonra yine mezbûre Râbia Hatun menzil-i mahdûd-ı mezbûru ba‘de’t-tahliyeti’ş-şer‘iyye ve’t-takābüzi’l-mer‘î târîh-i kitâbdan bir sene tamâmına değin on guruşa bana îcâr ve tesellüm ben dahi istîcâr ve tesellüm eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Saferi’l-hayr li-sene mi’e ve elf. Şuhûdü’l-hâl: İbrahim Çelebi b. Ahmed, el-Hâc b. Tevekkül, Hüseyin b. Mehmed, Hüseyin b. Mustafa.