İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 214 Hüküm no: 246 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarrac Yusuf Çelebi b. Abdullah’ın vefât eden İbrahim b. Hüseyin’de şirket ortaklığından olan alacağını varislerinden tahsil etmesi Mahmiye-i İstanbul’da Kadıasker Mehmed Efendi mahallesi sâkinlerinden Sarrâc Yusuf Çelebi b. Abdullah nâm kimesne meclis-i şer‘-i şerîf-i enverde mahalle-i mezbûre sükkânından olup mahrûse-i Edirne’de müsâfiren sâkin iken bundan akdem vefât eden el-Hâc İbrahim b. Hüseyin b. Ebûbekir nâm kimesnenin verâseti zevcesi Ümmihânî bt. Abdullah ile sulbî oğlu el-Hâc Mehmed ve sulbiye kebîre kızı Fâtıma’ya münhasıra olduğu şer‘an zâhir ve müte‘ayyin oldukdan sonra tereke-i müteveffâ-yı mezbûrun vârisleri ve terekesine vâzı‘atü’l-yed olan bâ‘iset-i hâze’l-kitâb mezbûrûn el-Hâc Mehmed ve Fâtıma ve Ümmihâni mahzarlarında ikrâr ve takrîr-i kelâm edip ben mukaddemâ müteveffâ-yı mezbûr el-Hâc İbrahim ile hayâtında vücûh-ı ticâretde şerîkler olup kable feshi akdi’ş-şirket mezbûr el-Hâc İbrahim fevt olmağla terekesinden mezbûrûn vâzı‘atü’l-yed olduklarından sonra merkūmûn ile beynimizde hesâb gördüğümüzde asl-ı mâl ve fâideden müteveffâ-yı mezbûrun zimmetinde on beş bin akçe hakkım zuhûr etmekle meblağ-ı mezbûr on beş bin akçeyi verese-i mezbûrûn bana def‘ u teslîm ben dahi yedlerinden bi’t-tamâm ahz u kabz eyledim, ba‘de’l-yevm şirket-i mezbûreye ve müteveffâ-yı mezbûr ile ile’l-vefât beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan verese-i mezbûrûnun zimmetlerin ibrâ-i âmm-ı kātı‘u’n-nizâ‘la ibrâ vü ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Saferi’l-hayr li-sene mi’e ve elf. Şuhûdü’l-hâl: Sarrâchâne Kethudâsı İbrahim Çelebi, Abdülvehhab b. İsmail, Sarrâc el-Hâc Mahmud, el-Hâc Mehmed b. Osman, el-Hâc İbrahim Çelebi b. Mustafa.