İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 215 Hüküm no: 247 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Hasan’ın zifaf gerçekleşmeden boşandığı eşi Ahmed Beşe b. Abdullah’da olan mehrin yarısını tahsil etmesi Mahmiye-i İstanbul’da el-Hâc Hasanzâde mahallesinde sâkine Fâtıma bt. Hasan Efendi nâm hatun vâlidesi ve tarafından husûs-ı âti’l-beyâna vekîl olduğu zâtlarını ma‘rifet-i şer‘iyye ile ârifân Müezzin Sinan Efendi b. Ali ve Ahmed Çelebi b. Şaban şehâdetleriyle sâbit olan Hanife bt. Abdullah nâm hatun meclis-i şer‘-i şerîf-i enverde mezbûre Fâtıma’nın zevc-i gayr-ı dâhili olan Ahmed Beşe b. Abdullah mahzarında bi’l-vekâle ikrâr-ı tâm ve takrîr-i kelâm edip mezbûr Ahmed Beşe [a]kdem müvekkile-i mezbûrenin altı bin akçe mehr-i müeccel tesmiyesiyle zevci olup hâlâ kable’d-dühûl tatlîk etmekle zimmetinde ma‘kūdün-aleyh olan altı bin akçe mehr-i müeccelinin nısfı olan üç bin akçeyi mezbûre Fâtıma Hâtûn’a edâ ve teslîm ol dahi ahz u kabz etdiğinden sonra hukuk-ı zevciyyete müte‘allika âmme-i da‘vâdan her biri âharın zimmetini ibrâ-i âmla ibrâ ve ıskāt eylediler dedikde gıbbe’t-tasdîki’ş-şer‘î mâ-vaka‘a bi’t-taleb ketb ve imlâ olundu. Fi’l-yevmi’s-sâbi‘ aşer min-Saferi’l-hayr li-sene mi’e ve elf. Şuhûdü’l-hâl: Abdurrahman Efendi el-İmâm, Musa Efendi el-Müezzin, Abdurrahman Çelebi b. Yusuf, Mustafa Çelebi b. Ahmed, Terzi Hasan b. Şaban, Abdurrahman Çelebi b. Yusuf, İbrahim Çelebi b. İbrahim.