İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 219 Hüküm no: 255 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. Palaş’ın Elenice bt. Papa Luka ile eşi Dolo v. Yani’deki alacağının tahsil edilmesi Mahrûse-i Galata’da Câmi‘-i Kebîr mahallesinde sâkin Manol v. Palaş nâm zimmî meclis-i şer‘-i şerîf-i enverde Elenice bt. Papa Luka nâm Nasrâniye muvâcehesinde üzerine da‘vâ ve takrîr-i kelâm edip işbu yedimde olan hüccet-i şer‘iyye nâtıka olduğu üzere mezbûre Elenice ile gāib ani’l-meclis zevci Dolo v. Yani zimmetlerinde cihet-i karz-ı şer‘îden seksen guruş hakkım olup hattâ meblağ-ı mezbûra ahadühümâ âharın zimmetine lâzım gelen mâla kefîller olmuşlar idi, mezbûreye suâl olunup meblağ-ı mezbûru asâlet ve kefâletine binâen bana edâya tenbîh olunmak matlûbumdur dedikde gıbbe’s-suâl mezbûre Elenice cevâbında fi’l-hakīka müdde‘î-i mezbûr Manol’a ber-vech-i muharrer zevcim Dolo ile meblağ-ı mezbûr seksen guruş zimmetimde deynimiz olup ahadühümâ âharın zimmetine lâzım gelen meblağa dahi kefîller olmuş idik deyü ikrâr u i‘tirâf etmeğin alâ mûcebi i‘tirâfihâ meblağ-ı mezbûr seksen guruşu mezbûr Elenice asâlet ve kefâletine binâen müdde‘î-i mezbûr Manol zimmîye edâ ve teslîme tenbîh birle mâ-hüve’l-vâkı‘ bi’t-taleb ketb olundu. Fi’l-yevmi’l-hâmis aşer min-Saferi’l-hayr li-sene mi’e ve elf. Şuhûdü’l-hâl: İbrahim Çelebi b. Ahmed, Çorlulu Mehmed Çelebi, Ebûbekir Çelebi b. ( ), Mustafa b. Ali, Ahmed b. İbrahim Efendi el-Kâtib.