İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 220 Hüküm no: 256 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırıncı Ermeni Ariz oğlu Sava ve Dukar ile Bogosi v. Bedros’un, tezgahtarları olan Kazer v. İsvador’da ekmek bedelinden dolayı olan alacaklarının tahsili Mahmiye-i İstanbul’da Gedikpaşa fırını ustası olan ashâb-ı hâze’l-vesîka Sava ve Dukar veledey Ariz ve Bogosi v. Bedros nâm Ermeniler meclis-i şer‘-i şerîf-i enverde Kazer v. İsvador nâm Ermeni muvâcehesinde her biri üzerine da‘vâ ve takrîr-i kelâm edip mezbûr Kazer mukaddemâ destgâhdârımız olmağla âhara bey‘ eylediği ekmek bahâsından bir mikdârını kendi masârıfına sarfla istihlâk etdiği mütehakkık olmağla mezbûr ile muhâsebe gördüğümüzde ba‘de külli’l-hesâb mezbûr Kazer zimmetinde yirmi dokuz bin yüz akçe bize deyni olduğunu alâ ru’ûsi’l-işhâd ikrâr ve işhâd dahi etmiş iken hâlâ bize edâdan imtinâ‘ eder, suâl olunup alıverilmesi matlûbumuzdur dediklerinde gıbbe’s-suâl ve akībü’l-inkâr ve ba‘de talebi’t-tenbîh udûl-i ricâlden olup yine tâife-i mezbûrenin hâlâ kethudâları olan Ahmed Beşe b. Abdullah ve el-Hâc Mustafa b. İbrahim nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu müdde‘ûn-ı mezbûrûn ve mukaddemâ destgâhdârları olan işbu mezbûr Kazer ile beynlerinde hesâb gördüklerinde mezbûr bey‘ eylediği ekmek bahâsından masârıfına sarfla istihlâk eylediği yirmi dokuz bin yüz akçe ba‘de külli’l-hesâb zimmetinde lâzımü’l-edâ deyn olduğunu ikrâr u i‘tirâf eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-hâmis aşer min-Saferi’l-hayr li-sene mi’e ve elf. Şuhûdü’l-hâl: Salih b. Mehmed, el-Hâc Mehmed b. Ali, Ebûbekir b. Ömer, İbrahim Çelebi.