İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 221 Hüküm no: 257 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Çelebi b. Murad Hoca’nın, Kehhalbaşı Mehmed Bey Vakfı’na rehin vermiş olduğu evini satmak üzere Mehmed Çelebi b. Ahmed’i vekil tayin etmesi Mahmiye-i İstanbul’da Beyceğiz mahallesinde merhûm Kehhâlbaşı Mehmed Bey Vakfı’na bi’l-fi‘il mütevellî olan İmâm Hüseyin Efendi b. Mustafa meclis-i şer‘-i şerîfde Halil Çelebi b. Murad Hoca b. Şaban nâm kimesne mahzarında üzerine da‘vâ ve takrîr-i kelâm edip yedimde olan işbu istiğlâl hücceti nâtık olduğu üzere mezbûr Halil Çelebi bin doksan yedi senesi Cemâziyelâhiresinden yedinde mülkü olup mahmiye-i mezbûrede Cerrahpaşa Câmi‘-i şerîfi kurbünde el-Hâc Ahmed mahallesinde vâki‘ bir tarafdan Veli mülkü ve bir tarafdan el-Hâc İbrahim Vakfı ve iki tarafdan tarîk-i âm ile mahdûd hâricen ve dâhilen büyût-ı adîde ve hamam ve bağçeyi müştemil mülk menzilin cümle tevâbi‘iyle bi-tarîki’l-istiğlâl beş yüz guruşa bana bey‘ ve temlîk ve teslîm ve meblağ-ı mezbûr beş yüz guruşu mâl-ı vakf-ı mezbûrdan benim yedimden tamâmen ahz u kabz edip ve ba‘de’t-tahliye ve’t-takābüz beher ayda altışar yüz yirmi akçeye istîcâr ve kabûl ve ücret-i mezbûrenin ayda ikişer guruşunu müezzinliği vazîfesinden almağla bana ihâle edip ben dahi târîh-i kitâb şehri gāyetine varınca vazîfe-i mezbûreden kırk guruş ahz u kabz ve hâlâ beynimizde hesâb görülüp gāyet-i mezbûreye gelince menzil ücretinden yedi bin dokuz yüz kırk akçe zimmetinde bâkī kalmağın hâlâ mezbûr Halil Çelebi’ye suâl olunup asl-ı mâl-ı mezbûr ile ücret-i bâkīye-i merkūmeyi bana edâ ve teslîme ve fekk-i rehne tenbîh olunmak matlûbumdur dedikde gıbbe’s-suâl mezbûr Halil Çelebi cevâbında kaziyye vech-i meşrûh üzere olup târîh-i mezbûrda menzil-i mahdûd-ı mezbûrumu ber-vech-i mübeyyen mütevellî-i merkūma istiğlâl beş yüz guruşa bey‘ ve teslîm ve meblağ-ı mezbûr beş yüz guruşu ahz u kabz ve vech-i meşrûh üzere istîcâr ve kabûl ve hâlâ asl-ı mâl-ı mezbûr ile ücret-i bâkiye dokuz yüz kırk [guruş] cânib-i vakfa zimmetinde [55a] cihet mûcebince lâzımü’l-edâ deyni olduğunu ikrâr u i‘tirâf etmeğin mûcebince ba‘de’l-hükm ve’t-tenbîh mezbûr Halil Çelebi meclis-i şer‘de vakf-ı mezbûrun câbîsi Mehmed Çelebi b. Ahmed mahzarında menzil-i mahdûd-ı mezkûru sûk-ı sultânîde ba‘de’l-müzâyede âhara bey‘ ve kabz-ı semen ve semeninden deynim olan meblağayn-i mezbûreyn beş yüz guruşla yedi bin dokuz yüz kırk akçeyi mütevellî-i merkūm Hüseyin Efendi’ye edâ ve teslîme ve fazla kalır ise bana îsâle ve husûs-ı mezbûr mütevakkıf olduğu umûrun cümlesine mütevellî-i merkūmun izniyle tarafımdan işbu merkūm Mehmed Çelebi’yi vekâlet-i devriye ile vekîl ve nâib-i menâb nasb u ta‘yîn eyledim deyü ikrâr ve tevkîl eyledikde merkūm Mehmed Çelebi dahi vekâlet-i mezbûreyi kabûl ve hizmet-i lâzımesini edâya ta‘ahhüd ve iltizâm eylemeğin mâ-hüve’l-vâkı‘ bi’t-taleb ketb ve imlâ olundu. Fi’l-yevmi’l-hâmis aşer min-Saferi’l-hayr li-sene mi’e ve elf. Şuhûdü’l-hâl: Ahmed Efendi b. Mehmed el-İmâm, Abdurrahman Efendi Kâtib, es-Seyyid Mehmed Çelebi b. ( ) Müezzin, Hasan Çelebi b. Mehmed, Hüseyin Çavuş b. Mehmed el-Mübâşir, İbrahim Çelebi b. Mehmed, el-Hâc Süleyman b. Çukadâr.