İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 222 Hüküm no: 258 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in köle bedelinden dolayı Kartal Subaşısı Ali Ağa b. Abdülhalim aleyhindeki alacak davasında anlaşma sağlaması Mahmiye-i İstanbul’da Ali Paşa-yı Atîk mahallesinde sâkin Mustafa b. Mehmed meclis-i şer‘-i hatîrde Üsküdar muzâfâtından Kartal nâm karyede subaşı olan işbu bâ‘isü’l-kitâb Ali Ağa b. Abdülhalim mahzarında ikrâr ve takrîr-i kelâm edip bana rıkkını mu‘terif açık kaşlı, orta boylu Gürciyyü’l-asl Hasan nâm abd-i memlûkum bundan [akdem] mâlımdan ibâkat ve firâr edip mezbûr Ali Ağa’nın subaşı olduğu Kartal nâm mevzi‘e varıp anda Ali Ağa gulâm ahz etdiği istimâ‘ım olup varıp ben gulâm-ı mezbûru mezbûr Ali yedinde bulup taleb eylediğimde kırk elli guruş vermedikçe sana vermem deyü rencîde etdikden sonra gulâm-ı mezbûr yedinde mazbûta iken fevt olup bundan akdem gulâm kıymetini ba‘de’l-isbât mezbûr Ali Ağa’dan da‘vâ ve taleb sadedinde iken ba‘de’n-nizâ‘ da‘vâ-yı mezkûrumdan mezbûr Ali Ağa benimle on iki buçuk guruş üzerine sulh olundukda ben dahi sulh-ı mezbûru kabûl ve bedel-i sulh olan meblağ-ı mezbûr on iki buçuk guruşu mezbûr yedinden on iki buçuk guruşu mezbûrun yedinden ahz u kabz edip ba‘de’l-yevm husûs-ı mezbûra müte‘allika âmme-i da‘vâdan mezbûr Ali Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîk mâ-hüve’l-vâkı‘ ketb şüd. Fi Muharrem sene mi’e ve elf. Şuhûdü’l-hâl: El-Hâc Hasan b. Hasan, el-Hâc İsmail, Osman Çavuş b. ( ), İbrahim Ağa [b.] Halil Efendi, el-Hâc Süleyman b. İbrahim.