İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 222 Hüküm no: 259 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Hacı Mehmed’in kefaletten dolayı Veli b. Oruç’a ödemiş olduğu parayı İsmail Ağa b. Ali’den tahsil etmesi Mahmiye-i İstanbul’da Çelebioğlu mahallesi sükkânından İbrahim Çelebi b. el-Hâc Mehmed nâm kimesne meclis-i şer‘-i şerîf-i enverde işbu râfi‘ü’l-kitâb İsmail Ağa b. Ali nâm kimesne mahzarında ikrâr-ı tâm ve takrîr-i kelâm edip mezbûr İsmail Ağa’nın gāib ani’l-meclis el-Hâc Veli b. Oruç nâm kimesneye cihet-i deyn-i şer‘îden iki yüz elli guruş deyni olup meblağ-ı mezbûr mukābelesinde yedinde mülkü olan bir semmûr paçası kürk ve bir sîm kemer raht ve bir sîm reşme ve bir sîm …? ve üç sîm kılıç ve iki sîm gaddâre ve bir sîm çapkun rahtını mezbûr el-Hâc Veli’ye rehin vaz‘ eyledikden sonra meblağ-ı mezbûra ben emr ve kabûlü hâviye kefâlet-i sahîha-i şer‘iyye ile kefîl olup ve merkūm İsmail Ağa bin doksan dokuz senesi Recebü’l-mürecceb gurresinden doksan bir gün tamâmında meblağ-ı mezbûru merkūm el-Hâc Veli’ye edâ etmezse rihân-ı mezbûreyi âhara bey‘ ve kabz-ı semene ve semenlerinden deyn-i mezbûru edâya vekâlet-i devriye ile tarafından beni vekîl edip ben dahi ba‘de’l-kabûl merkûm İsmail Ağa deyn-i mezbûru ba‘de tamâmi’l-ecel edâ etmekle rihân-ı mezbûreden sâlifü’z-zikr kemer raht ve reşme ve …? ve çapkun rahtı dokuz bin iki yüz akçeye mezbûr İsmail Ağa âhara bey‘ ve semenini bana teslîm ve mâ‘adâsı olan bir kürk ve üç kılıç ve iki gaddâreyi ben bi’l-vekâle on iki bin beş yüz yetmiş beş akçeye âhara bey‘ ve kabz-ı semen edip rihân-ı mezbûrenin semenleri olan cem‘an yirmi bir bin yedi yüz yetmiş beş akçeyi dâyin-i mezbûr el-Hâc Veli’ye bi’l-vekâle edâ ve bâkī sekiz bin iki yüz yirmi beş akçeyi kefâletime binâen kendi malımdan edâ eylediğimden sonra mezbûr İsmail Ağa’ya mürâca‘at edip kendi malımdan medfû‘um olan meblağ-ı mezbûru taleb eylediğimde mukābelesinde bana bir al esbini teslîm edip ben dahi ba‘de’l-ahz medfû‘uma ve zikr olunan atın cemî‘ uyûbu da‘vâsına müte‘allika âmme-i da‘vâdan mezbûr İsmail Ağa’nın zimmetini ibrâ ve ıskāt edip ol dahi deyn-i mezbûresine ve rihân-ı mezkûreye ve semenlerine ve mârru’z-zikr ata müte‘allika da‘vâdan benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-i vaka‘a bi’t-taleb ketb olundu. Şuhûdü’l-hâl: İsmail Ağa b. Mehmed, Mustafa Çelebi b. Mehmed, Çukadâr İbrahim, Abdurrahman b. Abdullah, Mustafa b. Abdullah.