İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 223 Hüküm no: 260 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Meyalo v. Marto’nun, kendisini bıçakla yaraladığı iddiasıyla Halil b. Hüseyin aleyhindeki davasında sulh olması Mahmiye-i İstanbul’da Cebeali kapısı kurbünde sâkin kassâb tâifesinden Meyalo v. Marto nâm zimmî meclis-i şer‘-i şerîf-i enverde işbu râfi‘ü’l-kitâb Halil b. Hüseyin nâm kimesne mahzarında ikrâr-ı tâm ve takrîr-i kelâm edip mezbûr Halil bundan akdem kara saplı Macar bıçağı ile işbu sol kolumun pazusun amden darb ve cerh etmekle mûceb-i şer‘îsi mezbûrdan taleb ve da‘vâ eylediğimde beynimizde münâza‘ât-ı kesîre cereyân etmişdi, el-hâletü hâzihî beynimize muslihûn tavassut edip da‘vâ-yı mezbûremden merkūm Halil ile on sekiz guruş üzerine sulh eylediklerinde ben dahi sulh-ı mezbûru kabûl ve bedel-i sulh-ı mezbûr on sekiz guruşu yedinden ahz u kabz edip cerh-i mezbûra ve mâ-tehaddese minhuya müte‘allika âmme-i da‘vâdan mezbûr Halil’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min-Saferi’l-hayr li-sene mi’e ve elf. Şuhûdü’l-hâl: Abdülbakī Beşe el-Mübâşir, El-Hâc İbrahim b. ( ), İbrahim b. Mehmed, Cerrâh Ali Çelebi b. Abdullah, Ali Beşe b. Abdullah, İbrahim Çelebi b. Ahmed.