İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 224 Hüküm no: 261 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin, Meryem bt. Ahmed aleyhindeki miras davasında haksız olduğu Mahmiye-i Üsküdar mahallâtından Davudpaşa mahallesi sükkânından olup bundan akdem fevt olan Mehmed Çelebi b. el-Hâc Ebûbekir b. Mehmed’in verâseti vâlidesi Meryem bt. Ahmed ile li-ebeveyn karındaşları Ahmed Çelebi ve Yusuf Çelebi’ye münhasıra olduğu şer‘an müte‘ayyin oldukdan sonra mezbûr Ahmed Çelebi meclis-i şer‘de işbu bâ‘isü’l-vesîka mezbûre Meryem muvâcehesinde üzerine da‘vâ ve takrîr-i kelâm edip işbu hâzır bi’l-meclis orta boylu açık kaşlı, elâ gözlü Rusiyyü’l-asl Abdullah b. Abdullah karındaşım müteveffâ-yı mezbûrun abd-i memlûku olup ba‘de vefâtihî irsen bize isâbet etmiş iken mezbûre abd-i mezbûra mâlikâne vaz‘-ı yed eder suâl olunsun dedikde, gıbbe’s-suâl mezbûre Meryem cevâbında fi’l-hakīka mevsûf-ı mezbûr oğlum müteveffâ-yı mezbûrun abd-i memlûku olup lâkin mezbûr târîh-i kitâbdan altı ay mukaddem hâl-i hayâtında mevsûf-ı mezbûru bana hibe-i sahîha-i şer‘iyye ile hibe ve temlîk ve teslîm ben dahi meclis-i hibede ittihâb ve kabûl edip gulâm-ı mezbûr mülk-i mevhûbum olmuşdur deyü def‘le mukābele edicek, gıbbe’l-istintâk ve’l-inkâr mezbûre Meryem’den müdde‘âsına beyyine taleb olundukda udûl-i müslimînden olup yine mahalle-i mezbûrede sâkin Himmet b. Şaban ve Hüseyin b. Mahmud nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Mehmed Çelebi b. Ebûbekir b. Mehmed târîh-i mezkûrede hâl-i hayâtında abd-i memlûku işbu mevsûf-ı mezbûru bizim huzûrumuzda vâlidesi mezbûre Meryem Hatun’a hibe-i sahîha-i şer‘iyye ile hibe ve temlîk ve teslîm ol dahi ittihâb ve kabûl ve kabz etmekle mezbûr Abdullah mezkûre Meryem Hâtûn’un mülk ve hakkı olduğuna biz şâhidleriz, şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-ışrîn min-Saferi’l-hayr li-sene mi’e ve elf. Şuhûdü’l-hâl: İsmail b. Ahmed Efendi, Mehmed b. Ebûbekir, Halil b. Mehmed Efendi, Bostancı Ahmed, İmâm Mehmed Efendi b. Müstakim, Salih Çelebi b. ( ), Murad Beşe b. Ahmed.