İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 289 Hüküm no: 362 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a sığır getiren celeblerden Maden Mukataası Defterleri’nde kayıtlı olan vergilerin dışında bir şey taleb edilmemesi Akzâ kuzâtü’l müslimîn evlâ vülâti’l-muvahhidîn ma‘denü’l-fezâ’ili ve’l-yakīn hüccetü’l-hak alâ halki’l-ecmâ‘în vârisü ulûmi’l-enbiyâi ve’l-mürselîn el-muhtas bi mezîdi inâyeti’l-meliki’l-Mu‘în Mevlânâ İstanbul Kādısı zîde fezâ’iluhu tevkî‘-i refî‘-i hümâyûn vâsıl olucak ma‘lûm ola ki İstanbul’a sığır getiren celeb tâifesi Dersa‘âdetime arzuhâl edip biz her sene İstanbul’a zebh vesâir zahîre için getirdiğimiz sığırlar beher re’sine üçer akçe resm veregelmişiken hâlâ bâc-pây-ı ağnâm ve tevâbi‘i mukāta‘ası emîni tarafından bâcdâr olanlar defter-i mûcebince almağa kanâ‘at eylemeyip hilâf-ı defter ziyâde taleb etmekle men‘i için mukaddemâ emr-i şerîfim verilip mûcebince tahrîrini recâ eyledikleri ecilden Hazîne-i âmiremde mahfûz olan Ma‘den Mukāta‘ası defterlerine nazar olundukda İstanbul’da Yedikule’de serçin ve derçin bâc-ı mürde ve [bâ]c-ı pây-ı ağnâm mukāta‘asının şart-ı iltizâm-ı kadîmî üzere Yedikule’de selhhâne içinde zebh olunan sığırdan dörder akçe ve koyun ve kuzu ve keçiden birer akçe her kim zebh eder ise müslimân ve keferedir mîrî resmi alınıp ve selhhâneden taşrada zebh olunur ise müslimândan câmûs başına yirmi dörder akçe ve karasığırdan on beşer akçe ve sağmalı sığırdan on sekizer akçe ve koyun ve kuzu ve keçiden birer akçe alınıp ve Yahudi’den câmûs başına otuz altışar akçe ve danadan altışar akçe ve koyun ve kuzu ve keçiden birer akçe alına ve pasdırma zamânında koşu davarından müslimândan on ikişer akçe ve getiren celebden câmûs olur ise altışar akçe ve karasığırdan üçer akçe ve resm-i huddâmiye buçuk akçe alınıp ve kefereden câmûs başına yirmi dörder akçe ve karasığırdan on ikişer akçe ve müslimândan dörder akçe alına ve tokâddan taşra yerde satılmaya şöyleki satarlar ise üç bin [77b] cerîmeleri alına geldiği defterde mastûr ve mukayyed bulunmağın imdi derkenârı mûcebince amel olunmak fermânım olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi Âsitâne-i sa‘âdetime sığır getiren celeb tâifesi getirdikleri sığırın defter mûcebince resm-i mîrîleri ve resm-i huddâmiyelerini verdiklerinden sonra min ba‘d defterden ziyâde talebiyle ümenâya, bâcdârlar fukarâyı rencîde ve remîde etdirmeyip vech-i meşrûh üzere emrimi yedinde getüresin şöyle bilesin alâmet-i şerîfe i‘timâd kılasın. Tahrîren fi’l-yevmi’l-hâmis ve’l-ışrîn min-Saferi’lhayr li-sene tis‘a ve tis‘în ve elf. Kostantıniyye el-mahrûse