İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 291 Hüküm no: 364 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefere hazırlanan ordu için lağımcı tedariki Akzâ kuzâti’l müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâ ve’l-mürselîn hüccetü’l-hakkı ale’l-halki ecma‘în el-muhtas bi-mezîdi inâyeti’l-meliki’l-Mu‘în Mevlânâ İstanbul Kādısı zîde fezâ’iluhu ve kıdvetü’l-emâcidi ve’l-a‘yân Âsitâne-i sa‘âdetimde bi’l-fi‘il Hâssa mi‘mârbaşısı olan ( ) zîde mecduhû tevkî‘-i refî‘-i hümâyûn vâsıl olucak ma‘lûm ola ki; İnşâallâhu te‘âlâ evvel-bahâr-ı huceste âsârda sefer-i hümâyûnum için lâğımcı tedâriki lâzım ve mühim olmağın her bir neferine taraf-ı mîrîden yüz guruş verilip ve yazılan lâğımcılar güçlü ve kuvvetli ve tuvânâ ve üstâd olmak üzere mi‘mârbaşı ma‘rifetiyle irsâl olunan mühürlü ve nişânlı mevkūfât defteri sûreti mûcebince İstanbul’dan iki yüz nefer lâğımcıyı isimleri ve her birinin yarar kefîlleri alınıp ve içlerinde ahvâl bilir birini bölükbaşı ta‘yîn edip isimleri ve kefîllerini defter olunup hâzır ve mevcûd etdirmeye ziyâdesiyle tekayyüd ve ihtimâm eyleyesiz şöyleki işbu bin yüz senesinde ihrâc olunması fermânım olan lâğımcıyı hâzır ve mevcûd eyledikden sonra defterini gönderdikde tevakkuf eylesiz ki bundan sonra fermânım ne vechile sâdır olur ise ana göre amel eyleyesiz deyü fermânım olmuşdur. Buyurdum ki; hükm-i şerîfimle ( ) vardıkda bu bâbda sâdır olan emrim üzere amel edip dahi irsâl olunan mühürlü ve nişânlı mevkūfât defter[i] mûcebince sene-i mezbûrede İstanbul’da ihrâc olunması fermânım olan ol mikdâr aynî nefer lâğımcıyı yarar kefîlleri olunup ve isimleri defter olunup bir gün mukaddem hâzır etdirmeğe ziyâdesiyle ihtimâm eyleyesiz ve yazılan lâğımcılar mi‘mârbaşı ma‘rifetiyle güçlü ve kuvvetli ve tuvânâ ve üstâd olmak üzere görüp ve üzerlerine içlerinden birini bölükbaşı ta‘yîn edip alîl ve sabî ve mecnûn adam yazılmakdan ihtirâz eyleyesin ve yazılan lâğımcıların isimlerini ve kefîllerini eyle defter edip defterini gönderip hâzır eyleyesiz ki ba‘dehû fermânım ne vech üzere sâdır olur ise ana göre amel oluna ve her bir nefer için yüzer esedî guruş ücretleri taraf-ı mîrîden verilip ana göre ihtimâm edip imhâl ve müsâmahadan ihtirâz eyleyesiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sânî aşer min-Muharremi’l-harâm li-sene mi’e ve elf. Be sahrâ-i Edirne.