İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 292 Hüküm no: 365 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefere çıkacak olan ordunun menzillerinde ekmek ihtiyacını karşılamak için İstanbul’da sekiz adet fırın hazırlanması Akzâ kuzâtü’l müslimîn evlâ vülâti’l-muvahhidîn ma‘denü’l-fezâ’ili ve’l-yakīn vârisü ulûmi’l-enbiyâ ve’l-mürselîn hüccetü’l-hakkı ale’l-halki ecma‘în el-muhtas bi mezîdi inâyeti’l-meliki’l-Mu‘în Mevlânâ İstanbul Kādısı zîde fezâ’iluhu tevkî‘-i refî‘-i hümâyûn vâsıl olucak ma‘lûm ola ki; İnşâallâhu te‘âlâ evvel-bahâr-ı huceste âsârda küffâr-ı dûzah-karâr üzerine sefer-i hümâyûnum mütekarrir ve muhakkak olup sefer-i hümâyûnuma memûr olan kapım kulları vesâir asâkir-i islâmın menâzilde ekmeklerini tabh eylemek için fırın ihrâc olunmak lâzım ve mühim olmağla İstanbul şehrinden mükemmel sekiz aded fırın sen ki kādı-i mûmâ-ileyhsin emr-i şerîfim vardığı gibi ale’l-acele tenbîh ve tedârik edip yarar kefîlleri ile hüccet-i şer‘iyye etdirip hâzır ve âmâde edip rikâb-ı hümâyûnuma arz ve i‘lâm eylemen bâbında fermânım sâdır olmuşdur. Buyurdum ki; hükm-i şerîfimli ( ) vardıkda [78b] bu bâbda sâdır olan emrim üzere amel edip dahi işbu bin yüz senesinde vâki‘ olan sefer-i hümâyûnuma memûr olan asâkir-i islâmın menzillerinde ekmeklerini tabh için İstanbul şehrinden ihrâcı fermânım olan sekiz aded mükemmel fırın emr-i şerîfim vardığı gibi tedârik ve tenbîh ve hâzır ve âmâde edip rikâb-ı hümâyûnuma arz ve i‘lâm eyleyesin ki ba‘dehû fermânım ne vechile sâdır olur ise mûcebiyle amel oluna. Şöyle bilesin alâmet-i şerîfe i‘timâd kılasın. Tahrîren fi’l-yevmi’s-sânî aşer min-Muharremi’l-harâm li-sene mi’e ve elf.