İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 292 Hüküm no: 366 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Mumcular Kethüdalığı, maaşı karşılığında Saray-ı atik Teberdarı Mustafa b. Yusuf’a verildiği Saray-ı atīk-i âmirem teberdârlarından yevmî iki akçe ulûfeye mutasarrıf olan işbu râifi‘-i tevkî‘-i refî‘‘ü’ş-şân-ı şehriyârî kıdvetü’l-emâsil ve’l-akrân Mustafa b. Yusuf zîde kadruhû rikâb-ı hümâyûnuma arzuhâl sunup İstanbul’da vâki‘ Mumcular kethudâlığı ber-vech-i te’kîd eşmek mukābelesinde kendiye verilmek bâbında inâyet recâ etmeğin mahall ü müstahık olmağın hakkında mezîd-i inâyet-i pâdişâhânem zuhûra getirip sâdır olan hatt-ı hümâyûn-ı sa‘âdet makrûnum ile verilen ruûs-ı hümâyûnum mûcebince zikr olunan kethudâlığı mezbûra eşmek mukābelesinde verip ve inâyet edip bin yüz senesi Muharremü’l-harâm’ının yirminci gününde bu berât-ı hümâyûn-ı sa‘âdet makrûnum verdim ve buyurdum ki; mûmâ-ileyh Mustafa b. Yusuf teberdâr-ı saray-ı atīk zîde kadruhû varıp vech-i meşrûh üzere İstanbul’da vâki‘ mumculara sâdır olan hatt-ı hümâyûn-ı sa‘âdet makrûnum mûcebince eşmeği mukābelesinde ber-vech-i te’kîd kethudâ olup hizmet-i lâzımesini müeddâ kıldıkdan sonra bundan akdem mutasarrıf olduğu ne minvâl üzere mutasarrıf ola geldiler ise mûmâ-ileyh ol minvâl üzere mutasarrıf olup ol bâbda efrâd-ı âferide hiçbir ferd dahl ve ta‘arruz etdirilmeyip mâni‘ ve müzâhim olmayalar şöyle bileler alâmet-i şerîfe i‘timâd kılalar. Fi’l-yevmi’s-sâmin ve’l-ışrîn min-Muharremi’l-harâm li-sene mi’e ve elf. Sahrâ-i Edirne.