İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 293 Hüküm no: 367 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eflani kazasında Osman Ağa’nın hizmetinde olup kovulduğu ve mallarına el konulduğu iddiasıyla İbrahim’in karısı Fâtıma bt. Himmet tarafından açılan davanın reddedildiği Vilâyet-i Anadolu’da Za‘feranborlu/Safranbolu kasabası ahâlîsinden olup mahmiye-i İstanbul’da müsâfir olan Fâtıma bt. Himmet nâm hâtun meclis-i şer‘-i hatîrde mahmiye-i mezbûrede Süleymaniye mahallesinde sâkin işbu bâ‘isü’l-kitâb Osman Ağa b. el-merhûm Burunsuz Mustafa Ağa mahzarında üzerine da‘vâ ve takrîr-i kelâm zevcim gâib ani’l-meclis İbrahim nâm kimesne bir kaç seneden beri merhûm Osman Ağa’nın Eflani kazâsında vâki‘ olan çiftliğinde katırcısı olmağla benimle ma‘an çiftlik-i mezbûrda merkūm Osman Ağa’nın hizmetinde olup ba‘dehû târih-i kitâbdan bir buçuk sene mukaddem ücretini merkūm Osman’dan taleb <> etmekle merkūm Osman Ağa bizi kovup ve eşyâ[-i] memlûkemden yirmi keyl buğday ve üç tencere ve on iki sahan ve iki döşek ve üç yorgan ve beş yemeni yastık ve üç kat çamaşır ve bir alaca ve bir kaftan-ı atlas ve bir sîm kuşak ve bir çift sîm bilezik ve üç kilim ve on iki vukıyye yağ ve iki baltamı köleleri getirip yediyle benden bi-gayrı hakkın ahz u kabz eyledi hâlâ suâl olunup geri alıverilmesi matlûbumdur dedikde gıbbe’s-suâl ve akībe’l-inkâr müdde‘iye-i mezbûreden sıdk-ı makāline beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘iye-i mezbûrenin eşyâ-i muharreresini ber-vech-i meşrûh köleleri yediyle ahz u kabz etmeyip üzerinde redd ü zamândan müdde‘iye-i mezbûrenin bir vechile hakkı olmadığına merkūm Osman Ağa’ya yemîn teklîf olundukda ol dahi alâ vefki’l-mes’ûl yemîn billâhi aliyyi’l-a‘lâ etmeğin mûcebince müdde‘iye-i mezbûre Fâtıma bilâ beyân bî-vech mu‘ârazadan men‘ olunup mâ-hüve’l-vâkı‘ ketb şüd Şuhûdü’l-hâl: İbrahim Çavuş b, Yusuf, Abdurrahman b. Abdi el-mübâşir, İbrahim Çelebi b. Ahmed, Mehmed Çelebi b. İdris, Hüseyin Çelebi [b.] Mustafa,