İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 294 Hüküm no: 369 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapiste olan Mehmed b. İlyas’ın tahliye talebi Mehmed b. İlyas Mezbûrun üzerine ashâb-ı ticâretden Ali Beşe ve Receb ve Abdülkādir nâm kimesneler Sultan odalarında odamıza girip beş yüz guruşumuzu fuzûlen ahz eyledi deyü iddi‘â eylediklerinde inkâr ve [re]dden iki yüz elli guruş üzerine sulh olup bedel-i sulh olan meblağ-ı mezbûr iki yüz elli guruşa mezbûrûna deyni olduğu Bâb mahkemesinden hüccet-i şer‘iyye olmağla izzetlü yeniçeri ağası hazretleri tarafından on üç bölük mumcusu Mustafa Beşe yediyle gelip habs olunmuşdur fermân sa‘âdetlü ve rif‘atlü sultânım hazretlerinindir. Fî 25 L. sene 1099 Sa‘âdetlü ve devletlü sultânım hazretleri sağ olsun. Bu kulları bir kimesne zindâna vaz‘ edip yüz günden mütecâviz zindânda kaldım bir vechile edâya iktidârım yokdur dâyinim ile mürâfa‘a için ıtlâk ve şer‘le iflâsım sâbit oldukda halâs buyurulmak recâ olunur. Bâkī fermân sultânımındır. Bende-i Mehmed. Sâh Fazîletlü İstanbul [E]fendisi Husûs-ı mezbûru şer‘le görüp iflâsı şer‘an sâbit ve zâhir olur ise yedine hüccet-i şer‘iyye vere deyü buyuruldu.