İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 295 Hüküm no: 370 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mukataa ve cizyeden maaş alan mütekaid ve duaguyanın onbeşer günlük ücretlerinin sefere yardım için kesilmesi Akzâ kuzâtü’l-müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâi ve’l-mürselîn hüccetü’l-hakkı ale’l-halki ecma‘în el-muhtas bi-mezîdi inâyeti’l-meliki’l-Mu‘în Mevlânâ İstanbul Kādısı zîdet fezâ’iluhu ve kıdvetü’l-emâcidi ve’l-a‘yân İstanbul’da Sandal mukāta‘ası emîni ( ) zîde mecduhû tevkî‘-i refî‘-i hümâyûn vâsıl olucak ma‘lûm ola ki; işbu sene-i mübârekede sefer-i hümâyûn iktizâsıyla memâlik-i mahrûsede mukāta‘adan ve hazîneden vezâyife mutasarrıf olan mütekā‘idîn ve duâgûyânın bir sene vazîfeleri imdâd-ı seferiye olunmak için alıkonulmak fermânım <> olmuş idi. Lâkin vezâyife mutasarrıf olanların vazîfeden gayrı maişetleri olmayıp fakīrü’l-hâl olmalarıyla bin yüz Muharrem’i gurresinden Sandal mukāta‘ası mâlından vezâyife mutasarrıf olanların beher ayda müstahık oldukları vazîfelerinden sâdır olan fermân-ı âlîşânım mûcebince on beş günlüğü kendilere verilip ve on beş günlüğü i‘ânet-i sefer olmak üzere mîrîye alıkonulup bu takdîrde altı aylık kendilere ve altı aylık mîrîye alıkonulup bilmiş olasız deyü fermânım olmuşdur. Buyurdum ki; hükm-i şerîfimle ( ) vardıkda bu bâbda sâdır olan emrim üzere amel edip dahi mukāta‘a-i mezbûreden vezâyife mutasarrıf olan mütekā‘idîn ve duâgûyânın beher mâh müstahık oldukları vazîfelerinin on beş günlüğü kendilerine verilip ve on beş günlüğü mîrî için alıkonulmak fermânım olmağla vech-i meşrûh üzere altı aylığı kendilere ve altı aylığı mîrî için alıkonulur bilmiş olasız ana göre ihtimâm edip vech-i meşrûh üzere olan emrimi yerine getiresiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’r-râbi‘ min şehri Muharremü’l-harâm li-sene mi’e ve elf. Sahra-i Edirne