|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 104 Hüküm no: 101 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mehmed Çelebi’nin evini Mehmed Beşe’ye sattığı
Mahmiye-i İstanbul’da Tahtelkale kurbünde el-Hâc Timurtaş Mahallesi’nde sâkin Mehmed Çelebi b. Şükrullah mahfil-i kazâda işbu kitâb-ı sıhhat-nisâbın sâhibi Mehmed Beşe b. Ali mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafı Samanveren Vakfı ve bir tarafı Hızır Ağa Vakfı ve bir tarafı Kasab Yunus Vakfı ve bir tarafı tarîk-i âm ile mahdûd dâhiliyesi üç bâb fevkānî odaları ve bir şehnişîni ve bi’r-i mâ ve kenîfi ve ahırı ve tahta-pûşu ve hâriciyesi iki bâb tahtânî odaları müştemil olup bennâ zirâ‘ı ile tûlen on sekiz ve arzan dokuz zirâ‘ arsasının merhûm Sarraf Ali Vakfı’ndan senevî üç yüz altmış akçe mukāta‘a-i zemîni olup babamdan olmağla mülk-i mevrûsum olan menzilimi cümle tevâbi‘ ve levâhıkı ve kâffe-i menâfi‘ [ve] merâfıkı ile yetmiş beş bin nakd râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı merkūm yetmiş beş bin akçeyi bi’t-tamam ve’l-kemâl ahz u kabz edip zikr olunan arsasının dahi hakk-ı tasarrufunu vakf-ı mezbûr mütevellîsi ma‘rifetiyle merkūm Mehmed Beşe’ye tefvîz eyledim, ol dahi müfevvez ve kabûl eyledi, ba‘de’l-yevm keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Fi’l-yevmi’s-sâmin aşer min-Şevvâli’l-mükerrem li-sene selâse ve sittin ve elf.
Şuhûdü’l-hâl: Himmet Beşe b. Mehmed, Mahmud Beşe b. Mehmed, Ahmed b. el-Hâc Hasan, Ömer b. Hasan, Ali b. Veli, İbrahim b. Mahmud, Mehmed Beşe, İbrahim b. Mahmud, Ahmed Beşe b. Mehmed, Haydar b. Abdi, Halil b. Osman, Abdulkādir b. Mustafa, Ali b. Halil, el-Hâc Mehmed b. el-Hâc Ali, Sabuncu Ali Beşe b. Sarı el-Hâc Mustafa, Osman Pazarbaşı, Mehmed Beşe b. ( ).
|