|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 105 Hüküm no: 102 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
el-Hâc Mehmed’in oğulları Ahmed ve Mahmud ile kız kardeşi İsmihan’dan başka vârisleri olmadığı
Vilâyet-i Anadolu’da Karaman Ereğlisi nâm kasaba ahâlîsinden Ahmed ve Mahmud ibney Ali nâm kimesnelerden vech-i âtî üzere istişhâd-ı şer‘î sudûrundan sonra yine kasaba-i mezbûre sükkânından Mehmed Bey b. Ali el-cündî ve diğer Mehmed Bey b. veledân-ı el-cündî meclis-i şer‘-i şerîfe hâzırân olup mahmiye-i İstanbul’da Pertev Paşa Hanı’nda müteveffâ olup terekesi medîne-i İzmir’de kız karındaşı İsmihan Hatun yedinde ve sâir kimesneler tasarrufunda olan el-Hâc Mehmed b. Hamza’nın müsteşhidân-ı mezbûrân li-ebeveyn ammi oğulları ve usûbet-i nesebiye cihetinden vârisleri olup müsteşhidân-ı mezbûrânın babaları merkūm Ali ile müteveffâ-i mezbûrun babası mezkûr Hamza li-ebeveyn karındaşlardır, babaları ismi yine el-Hâc Mehmed ve anaları ismi Havvâ Hatun ve maskat-ı re’sleri kasaba-i mezbûre olup müteveffâ-i mezbûrun mezbûre İsmihan ile müsteşhidân-ı mezbûrân Ahmed ve Mahmud’dan gayrı vârise ve terekesine müstehık olduğu ma‘lûmumuz değildir, bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de ri‘âyeti şerâyiti’l-kabûl şehâdetleri hayyiz-i kabûle vusûl bulmağın mâ-hüve’l-vâki‘ bi’t-taleb sebt ü ketb olundu.
Yevmü’s-sânî ve’l-ışrîn min-Şevvâli’l-mükerrem min-şühûr li-sene selâse ve sittin ve elf.
Şuhûdü’l-hâl: Şeyh Mehmed Çelebi b. Musa Efendi, Seyyid Bey b. Hüseyin, Mehmed Çelebi b. Hüseyin, İbrahim Çelebi b. Davud, Kara Halil Beşe b. Lütfullah ve gayruhum mine’l-huzzâr.
|