İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 301 Hüküm no: 375 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli Kıbtiyan taifesinin cizye ve ispençelerinin tahsili Akzâ kuzâti’l müslimîn evlâ vülâti’l-muvahhidîn ma‘denü’l-fezâ’ili ve’l-yakīn hüccetü’l-hakkı ale’l-halki ecma‘în vâris-i ulûmü’l-enbiyâ ve’l-mürselîn el-muhtas bi mezîdi inâyeti’l-meliki’l-Mu‘în Mevlânâ İstanbul Kādısı zîdeti fezâ’iluhu ve mefâhirü’l-kuzât ve’l-hükkâm ma‘denü’l-fezâ’ili ve’l-kelâm vilâyet-i İstanbul’da ve tevâbi‘i aklâmı Kıbtiyân sâkin olan yerlerin kādıları zîdet fezâ’ilühüm tevkî‘-i refî‘-i hümâyûn vâsıl olucak ma‘lûm ola ki; kıdvetü’l-emâcidi ve’l-a‘yân bi’l-fi‘il Rumeli’nde Mîr-i Kıbtiyân olan Mehmed zîde mecduhû Dersa‘âdetime mühürlü tezkire gönderip aklâm-ı mezbûra tâbi‘ Kıbtiyân tâifesinin bin doksan dokuz senesi Zilhicce’sinin yirmi[nci] gününde üzerlerine edâsı lâzım gelen cizye ve ispençe ve rüsûm-ı sâirelerini nezâretim hasebiyle tarafımdan cem‘ ve <> tahsîli için ber vech-i maktû‘ ( ) zîde kadruhûya deruhde edip eline mühürlü ve ma‘mûlün bih kefîlnâme temessükü verdiğini bildirip mûcebince kâdîmden bu ana dek cem‘ ve tahsîl olageldiği üzere cem‘ ve tahsîl etdirilmek bâbında emr-i şerîfim recâ etmeğin zamânı hulûl eyledikde nâzır-ı mûmâ-ileyhin temessükü mûcebince kadîmden olageldiği üzere cem‘ ve tahsîl etdirilmek emr edip buyurdum ki; hükm-i şerîfimle mübâşir-i mezbûr vardıkda bu bâbda sâdır olan emr üzere amel edip dahi aklâm-ı mezbûra tâbi‘ Kıbtiyân tâifesinin bin doksan dokuz senesine mahsûb olmak üzere üzerlerine edâsı lâzım gelen cizye ve ispençeleri <> için işbu sene-i mübârekede cülûs-ı hümâyûnum vâki‘ olup beşer akçe cülûs-ı hümâyûnum akçesi zam olunmağla müslimân nâmında olanlardan altışar yüz elli beşer akçe ve keferesinden yedişer yüz yirmi beşer akçe cizyelerin cem‘ ve tahsîl etdirip hilâf-ı emr-i şerîf kimesneye ta‘allül ve nizâ‘ etdirmeyesiz ve Kıbtiyân tâifesi kadîmden min külli’l-vücûh mefrûzü’l-kalem ve maktû‘ü’l-kadem serbest olup beher sene üzerlerine edâsı lâzım gelen cizye ve ispençeleri ve rüsûm-ı sâirelerini Mîr-i Kıbtiyân vekîlleri ma‘rifetiyle yed-i vâhidden cem‘ ve tahsîl oluna gelmekde ve vekîl-i mezbûre dahi serbestiyet üzere yed-i vâhidden cem‘ ve tahsîl etdirip min ba‘d tâife-i mezbûrenin vâkı‘a ve olan beytülmâl-i âmme ve hâssa ve cürm-i cinâyet ve bâd-ı havâ vesâir küllî ve cüz’î hukūk ve rüsûmlarına vüzerâ ve beylerinin ve sancakbeyi adamları ve subaşıları ve voyvodaları ve evkāf ve emlâk zâbitleri vesâir ehl-i örf tâifeleri ve taraf-ı âhardan bir ferdi kadîmden olagelmişe muhâlif dahl u ta‘arruz etdirmeyesiz. Şöyle bilesiz alâmet-i şerîfe i‘timâd kılasız. Tahrîr[en] fi’l-yevmi’l-ışrîn şehri Ramazâni’l-mübârek li-sene tis‘a ve tis‘în ve elf. Be makām-ı Kostantıniyye.