İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 302 Hüküm no: 376 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefere çıkacak ordu için çadır hazırlanması Akzâ kuzâti’l müslimîn evlâ vülâti’l-muvahhidîn ma‘denü’l-fazli ve’l-yakīn hüccetü’l-hakkı ale’l-halki ecma‘în vâris-i ulûmü’l-enbiyâ ve’l-mürselîn el-muhtas bi mezîdi inâyeti’l-meliki’l-Mu‘în Mevlânâ İstanbul Kādısı zîde fezâ’iluhû tevkî‘-i refî‘-i hümâyûn vâsıl olucak ma‘lûm ola ki; inşâallâhu te‘âlâ İstanbul ferhunde-fâlde küffâr-ı dûzah karâr üzerine sefer-i hümâyûnum mukarrer ve mütehakkık olup sefer-i hümâyûnuma memûr olan asâkir-i nusret-şi‘ârım için mu‘tâd üzere aynı ordu ihrâcı lâzım ve mühim olmağın imdi mübâşirin yedine verilen mühürlü ve nişânlı mevkūfât defteri mûcebince mahrûse-i İstanbul’un ordusu için yirmi yedi hırfet olmak üzere seksen dört çadır ihrâc ve bir gün evvel hâzır ve âmâde etdirip ba‘dehû fermânım vardıkda mûcebince amel eylesiz deyü fermânım olmuşdur. Buyurdum ki; hükm-i şerîfimle kıdvetü’l-emâsili ve’l-akrân Mehmed zîde kadruhû vardıkda bu bâbda sâdır olan fermân-ı celîlü’l-kadrim mûcebince amel edip iş bu bin yüz senesinde vâki‘ olan sefer-i hümâyûnum mahmiye-i mezbûreden ihrâcı fermânım olan ol mikdâr hırfet kılman orduyu irsâl olunan mühürlü ve nişânlı mevkūfât defteri sûreti mûcebince mu‘accelen tedârik ve hâzır ve âmâde etdirip Dersa‘âdetime arz ve i‘lâm eyleyesiz ki ba‘dehû fermânım [ne] vakt sâdır olursa mûcebince amel oluna. Şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâmin şehri Muharremi’l-harâm li-sene mi’e ve elf.