İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 304 Hüküm no: 379 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahyolu memlehasında üretilen tuzun satışı Akzâ kuzâti’l müslimîn evlâ vülâti’l-muvahhidîn me‘âdinü’l-fezâ’ili ve’l-yakīn hüccetü’l-hakkı ale’l-halki ecma‘în vâris-i ulûmü’l-enbiyâ ve’l-mürselîn el-muhtas bi mezîdi inâyeti’l-meliki’l-Mu‘în İstanbul ve Galata ve Üsküdar ve Haslar kādıları zîdet fezâ’iluhu ve mefâhirü’l-kuzât ve’l-hükkâm me‘âdinü’l-fezâ’ili ve’l-kelâm İznikmid ve Odalar ve Silivri ve Edirne ve Çekmeceler ve ( ) kādıları zîde fezâ’ilihüm tevkî‘-i refî‘-i hümâyûn vâsıl olucak ma‘lûm ola ki; bin doksan dokuz senesine mahsûb olmak üzere Ahyolu memlehası mukâta‘âtı nâzırı olan ve mültezimleri Kiryon nâm zimmî Edirne’de ordu-yı hümâyûnuma arzuhâl edip memleha-i mezbûreden hâsıl olan mîrî tuzu örüsü olan yerlerde kadîmden olageldiği üzere ehl-i sûka tevzî‘ etdirilip kimesneye ta‘allül ve nizâ‘ etdirilmemek bâbında emr-i şerîfim recâ eyledikleri ecilden Hazîne-i âmiremde mahfûz olan Başmukāta‘a defterlerine nazar olundukda zikr olunan Ahyolu memlehası mukâta‘âtının mahmiye-i İstanbul ve Galata ve Üsküdar ve Haslar ve İznikmid ve Adalar ve Varna ve Silivri ve Çekmeceler ve tevâbi‘i Vize iskeleleri kadîmden örüsü olup şart-ı iltizâmlarında mukayyed bulunmağın zikr olunan yerlerin ehl-i sûkuna kadîmîsi üzere bin doksan sekiz senesinde hâsıl olan mîrî tuzun beher kilesi yirmi ikişer akçeye olmak üzere tevzî‘ ve akçesi mîrî için cem‘ ve tahsîl etdirile deyü bin doksan dokuz Rebî‘u’levveli’nin yirmi dokuzuncu [günü] emr-i şerîf verildiği mastûr ve mukayyed bulunmağın imdi derkenârı mûcebince amel olunmak fermânım olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi vech-i meşrûh üzere memleha-i mezbûreden hâsıl olan mîrî tuzu örüsü olan zikr olunan kazâların ehl-i sûkunda mu‘tâd-ı kadîm üzere tevzî‘ ve akçesini mîrî için cem‘ ve tahsîl etdirdip hilâf-ı mu‘tâd kimesneye ta‘allül ve nizâ‘ etdirmeyip emr-i âhar irsâline muhtâc eylemeyesiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’l-hâmis aşer min şehri Zilhicce li-sene tis‘a ve tis‘în ve elf. Sahrâ-i Edirne.