İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 305 Hüküm no: 380 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanma kadırgaları için gerekli olan kürekçi bedelinin tahsili Akzâ kuzâtü’l müslimîn evlâ vülâti’l-muvahhidîn ma‘denü’l-fazli ve’l-yakīn <> vâris-i ulûmü’l-enbiyâ ve’l-mürselîn hüccetü’l-hakkı ale’l-halki ecma‘în el-muhtas bi mezîdi inâyeti’l-meliki’l-Mu‘în Mevlânâ İstanbul Kādısı zîdet fezâ’iluhû tevkî‘-i refî‘-i hümâyûn vâsıl olucak ma‘lûm ola ki; İşbu sene-i mübârekede deryâ yüzüne çıkacak Donanma-i hümâyûnum kadırgaları için İstanbul izâfetinden? her ne aynî kürekçi ihrâc ve mu‘tâd-ı kadîm olmağla bin yüz senesine mahsûb olmak üzere hammâlân tâifesinden kırk nefer ve İstanbul Yahudilerinden yüz elli nefer ve Rûmiyân tâifesinden yüz yirmi dört nefer ve Ermeniyân tâifesinden yüz nefer ki cem‘an dört yüz on dört nefer kürekçi olup her bir neferden ellişer kâmil guruş bedelleri tahsîl oluna gelmiş iken mukaddemâ sâdır olan fermân-ı şerîfim mûcebince sefer hazînesine elli dört buçuk esedî guruş ile beşer akçe bedellerini irsâl olunan mühürlü ve nişânlı mevkūfât defteri sûreti mûcebince cem‘ ve tahsîl ve Donanma-i hümâyûnum için iktizâ eden kürekçi bedeliyesi verilmek üzere hâlâ Tersâne-i âmirem emîni ile ( ) zîde mecduhûya teslîm etdirilmek fermânım olmuşdur. Buyurdum ki; hükm-i şerîfimle ( ) vardıkda bu bâbda sâdır olan emrim üzere amel edip dahi zikr olunan hammâlân ve Yahudiyân ve Rûmiyân ve Ermeniyân’dan ihrâc olunan ol mikdâr neferin her bir neferden târih-i mezbûra mahsûb olmak üzere sefer hazînesine elli dörder buçuk esedî ile beşer akçe bedellerini irsâl olunan mühürlü ve nişânlı mevkūfât defteri sûreti mûcebince cem‘ ve tahsîl ve Donanma-i hümâyûnum kadırgaları için iktizâ eden kürekçi bedeliyesi verilmek üzere emîn-i mûmâ-ileyhe bi’t-tamâm edâ ve teslîm etdirilip hilâf-ı emr-i defter kimesneye ta‘allül ve muhâlefet etdirmeyesiz ve sicil-i ? defterden ve hilâf-ı emr-i defter kimesneye zulm ve te‘addî den ihtirâz edesiz. Şöyle bilesiz. Tahrîren fî şehri Zilka‘de li-sene tis‘a ve tis‘în ve elf. Fî Edirne.