İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 71 Hüküm no: 3 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransız Loronce v. Covanni’nin Hüseyin Çelebi b. Abdullah’tan alacağına karşılık rehin aldığı evini Hüseyin’e geri vermesi Françe tüccârından olup mahrûse-i Galata’da Bereketzâde mahallesinde sâkin bâ‘isü hâze’l-kitâb Loronce v. Covanni nâm müste’men hâlâ Françe elçisinin baştercümanı olan Fronini v. Can Batista hazır iken meclis-i şer‘-i şerîf-i enverde mahmiye-i İstanbul’da Yavuzerzâde Sinan Bey mahallesi sükkânından Hüseyin Çelebi b. Abdullah nâm kimesne mahzarında üzerine da‘vâ ve takrîr-i kelâm edip bundan akdem mezbûr Hüseyin Çelebi zimmetinde yedimden iştirâ ve ahz u kabz ve istihlâk eylediği adedi beynimizde ma‘lûm balya ta‘bîr olunur kâğıd bahâsından ba‘de külli’l-hesâb sekiz yüz guruş hakkım olup hatta bin yüz altı senesi Cumâdelâhire’sinin yedinci günü mahmiye-i mezbûrede nâibü’ş-şer‘i’ş-şerîf olan umdetü’l-müderrisîni’l-kirâm Mehmed Efendi b. Eyüb Efendi tarafından bi’l-iltimâs husûs-ı âti’z-zikri tahrîre me’zûnen irsâl olunan Mustafa Efendi b. Ömer’in mahalle-i mezbûrda merkūm Hüseyin Çelebi’nin sâkin olduğu menzilinde sikât-ı makbûletü’l-kelimât huzûrlarında akd eylediği meclis-i şer‘de vech-i mezkûr üzere yedimden iştirâ ve ahz u kabz [ve] istihlâk eylediği balya ta‘bîr olunur kâğıd bahâsından zimmetinde bana edâsı lâzım sekiz yüz guruş deyni olduğunu mezbûr Hüseyin alâ re’s-i istişhâd ikrâr u i‘tirâf ve işhâd dahi eyledikden sonra arsası merhûm el-Hâc Mahmud vakfından senede yedi yüz kırk akçe mukāta‘a ile zevcesi Ayşe Hatun bt. el-Hâc Mehmed ile ale’l-iştirâk taht-ı tasarruflarında ve ebniyesi kezâlik mezbûre ile iştirâken silk-i mülklerinde münselik olup zikrolunan Yavuzerzâde Sinan Bey mahallesinde vâki‘ bir tarafı odabaşı tasarrufunda olan uncu değirmeni ve bir tarafdan es-Seyyid İsmail Çelebi tasarrufunda olan vakıf menzil ve bir tarafı vakıf odalar ve bir tarafı tarîk-i âm ile mahdûd büyût-ı adîdeyi müştemil menzilin ebniyesini mezbûre Ayşe Hatun’un izn ve ma‘rifeti ile târih-i mezbûrdan bir sene tamamına değin bey‘-ı bi’l-vefâ vechi üzere mezbûr Hüseyin Çelebi sekiz yüz guruşa bana bey‘ ve teslîm ben dahi iştirâ ve tesellüm edip semen-i mezbûr sekiz yüz guruşu deyn-i merkūm sekiz yüz guruşa takās ben dahi mukāssa ve kabûl etmeğin husûs-ı mezbûru mevlânâ-yı mezbûr Mustafa Efendi mahâllinde tahrîr ba‘dehû ma‘an ba‘s olunan Mahmud b. Ahmed ve Hasan b. Ali ile meclis-i şer‘a varıp ba‘de’l-inhâ işbu hüccet-i şer‘iye bi’t-taleb tahrîr olundukdan sonra menzil-i mezbûrun arsasını dahi mezbûr Hüseyin Çelebi ve zevcesi merkūme Ayşe Hatun vakf-ı mezbûra bi’l-fi‘il mütevellî olan işbu hazır bi’l-meclis Abdullah Efendi b. Mustafa’nın müvekkilesi Havva Hatun’un izn ve ma‘rifeti ile bana ferâğ ve tefvîz ben dahi tefevvüz ve kabûl ve işbu mütevellî temessüğünün kenarına tahrîr olunmuşidi hâlâ müddet-i mezbûre tamam olmağla menzil-i mezbûru merkūm Hüseyin Çelebi’den taleb eylediğimde edâdan imtinâ‘ ve menzil-i mezbûrda fuzûlen sâkin olup rehniyet üzere tasarrufuma mâni‘ olur suâl olunup alıverilmesi matlûbumdur deyü herbirinin mazmûnu min-külli’l-vahde takrîr-i meşrûhuna mutâbık hüccet-i şer‘iye ve mütevellî temessüğü ibrâz etmeğin gıbbe’s-suâl mezbûr Hüseyin Çelebi cevâbında ben müdde‘î-i mezbûrdan kat‘a kâğıd iştirâ ve kabz etmeyip cihet-i mezbûreden kendiye asla deynim yoğiken yedinden iştirâ ve kabz eylediğim balya ta‘bîr olunur kâğıd bahâsından müdde‘î-i mezbûr Loronce’ye zimmetimde edâsı lâzım sekiz yüz guruş deynim vardır deyü târih-i mezbûrda meclis-i mezkûrda tâyi‘an ikrâr u i‘tirâf edip ve zevcem mezbûrenin izn ve ma‘rifeti ile menzil-i mezbûrun ebniyesini ber-vech-i meşrûh târih-i mezbûrdan bir sene tamamına değin sekiz yüz guruşa müdde‘î-i mezbûr Loronce’ye vefâen bey‘ u teslîm ve semen-i mezbûru deyn-i merkūma takās arsasını dahi mütevellî-i mezbûrenin izn [ve] ma‘rifetiyle ferâğ ve tefvîz etmişidim lâkin ikrâr-ı mezkûrumda kâzibim deyicek fi’l-hakīka mezkûr Hüseyin Çelebi ikrâr-ı mezkûrunda kâzib ve kendi da‘vâ-yı meşrûhasında mubtıl olmadığına müdde‘î-i mezbûr Loronce’ye bi’t-taleb yemîn teklîf olundukda ol dahi hasbe’l-mesûl yemîn billâhillezî enzele’l-İncîle alâ İsa -aleyhisselâm- etmeğin menzil-i mezbûr vakf arsa ile meşgūl olmağla rehneyn-i mezbûreyn fâsid olup ve rehn-i fâsidin hükmü rehn-i sahîh hükmü gibi olmağla edâ-i deyn edinceye değin mürtehin için hakk-ı habsolmağın mûcebiyle menzil-i mezbûru rehniyet üzere müdde‘î-i mezbûra ba‘de’t-teslîm meblağ-ı mezbûr sekiz yüz guruşu edâ ile fekk-i rehne mezkûr Hüseyin Çelebi’ye tenbîh olunup mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Cumâdelâhire li-sene seb‘a ve mie ve elf. Şuhûdü’l-hâl: [2b] A‘lemü’l-ulemâ’i’l-hükkâm ebû’l-mekârim es-Seyyid Mehmed Efendi el-kādî bi-Galata hâlâ, Umdetü’l-mevle’l-izâm Ali Efendizâde Mehmed Efendi el-kādî bi-Galata sâbık, Umdetü’l-müderrisîni’l-kirâm Tefsîrzâde? ( ), Umdetü’l-a‘yân Mustafa Ağa Kethudâ-yı hazret-i Şeyhülislâm-ı sâbık Sâdık Efendi, Çiçegî Solakzâde Halil Ağa b. ( ), Abdullah Efendi el-imâm-ı mahalle-i mezbûre, es-Seyyid İbrahim Efendi b. Abdülfettah, Mehmed Çelebi b. Hüseyin, Müezzin Hasan b. Mehmed, Mehmed Çavuş b. Abdullah, el-Hâc Mehmed b. Mustafa ve gayruhum mine’l-Hâzırîn. Yevm-i erba‘a fî 13 min-Cumâdelâhire sene 1107 Yevmü’l-hamîs fî 14 min-Cumâdelâhire sene 1107 Yevm-i Cum‘a fî 15 min-Cumâdelâhire sene 1107