İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 73 Hüküm no: 4 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahim b. Hasan’ın, evinin enkazını kardeşi Abdurrahman b. Hasan’a sattığı Mahmiye-i İstanbul’da Aksaray kurbünde el-Hâc Bayram mahallesinde vâki‘ bir tarafı Bezzâz Yusuf Çelebi menzili ve bir tarafı Çorbacı Hüseyin Ağa menzili ve bir tarafı Molla Mehmed ve Abdurrahman Çelebi menzilleri ve bir tarafı tarîk-i âm ile mahdûd mukaddemâ büyût-ı adîdeyi müştemil menzilin ebniyesi mülk ve arsası merhûm Emir Ahmed nâm sahibü’l-hayrın süknâsı ulemâdan bir recüle meşrûta vakfı olup ebniye-i mezbûrenin mâliki ve arsa-i merkūmenin tevcîh-i hâkimü’ş-şer‘le mutasarrıfı olan Abdurrahim Efendi b. Hasan nâm kimesne meclis-i şer‘-i şerîf-i enverde li-ebeveyn karındaşı işbu râfi‘u’l-kitâb Abdurrahman Efendi mahzarında ikrâr-ı tâm ve takrîr-i kelâm edip menzil-i mezbûr ber-vech-i meşrûh taht-ı tasarrufumda iken bin yüz beş senesi Muharremi’l-harâm’ında vâki‘ harîkde muhterik olup arsa-i sırfa ve içinde enkāz-ı ma‘lûmesi kalmağın hâlâ arsa-i mezbûrede mevcûd olan enkāzı karındaşım mezbûr Abdurrahman Efendi’ye kırk guruşa bey‘ u temlîk ve teslîm ol dahi iştirâ ve kabûl ve temellük ve tesellüm eyledikden sonra semen-i mezbûr kırk guruşu yedinden tamamen ahz u kabz edip enkāz-ı mezbûre mezkûr Abdurrahman Efendi’nin mülk-i müşterâsı olup arsa-i mezbûreden dahi kasr-ı yed eyledim dedikde gıbbe’t-tasdîkı’ş-şer‘î işbu kitâb-ı müşgîn-nikāb-ı tevkī‘-i refî‘-i müstetâbî ile şeref-yâb olan hâkim-i ma‘delet-nisâb tûbâ-lehû ve hüsnü-meâb hazretleri dahi arsa-i mevkūfe-i mezbûreyi ber-mûceb-i şart-ı vâkıf kıbel-i şer‘den mezkûr Abdurrahman Efendi’ye tevcîh edip tasarrufi’çün işbu vesîka bi’t-taleb ketb olundu. Fi’l-yevmi’s-sâmin aşer min-Cumâdelâhire li-sene seb‘a ve mie ve elf. Şuhûdü’l-hâl: Mustafa Bey b. ( ), Koca İbrahim Bey b. ( ), Müezzin İbrahim Çelebi b. ( ), Hasan Efendi Müezzin-i Gül Câmi‘, Taşçı Ali, el-Hâc Yahya el-Attar, Yusuf Beşe b. Abdullah, İbrahim Çelebi b. Ahmed. Yevm-i sebt fî 16 min-Cumâdelâhire sene 1107 Yevm-i ahad fî 17 min-Cumâdelâhire sene 1107