İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 74 Hüküm no: 5 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa b. İyad’ın kendisini Kandiye Ceziresi Ağalığı yapmak üzere Ali Ağa b. Ömer’e verdiği iki saatini geri aldığı Cezîre-i Kandiye ahâlîsinden olup mahmiye-i İstanbul’da Uzunçarşı kurbünde sâkin Süleyman Ağa b. İyâd nâm kimesne meclis-i şer‘-i enverde işbu râfi‘u’l-kitâb Ali Ağa b. Ömer nâm kimesne mahzarında üzerine da‘vâ ve takrîr-i kelâm edip târih-i kitâbdan bir buçuk sene mukaddem mezbûr Ali Ağa Vezîriazam merhûm Ali Paşa’nın ağalarından iken cezîre-i mezkûre ağalığını benim üzerime etdirmek için altı yüz guruş olmak üzere on altı bin Mısrî para ve seksen dokuz eşrefî altın ile kırk beş guruş kıymetli bir minalı akreb sâ‘at ve yirmi guruş kıymetli bir billûr zarflı akreb sâ‘ati bi-tarîkı’r-rüşve ahz u kabz edip zikrolunan ağalık âhara tevcîh olunup benim için zabtı dahi müyesser olmayıp meblağayn-ı mezbûreyn ile zikrolunan sâ‘atler mezbûrun yedinde kalmağın hâlâ suâl olunup a‘yânı mevcûde ise a‘yânını değil ise ba‘de’s-sübût kıymeti olanın kıymet-i şer‘iyelerini ve misli olanın misillerini bana redd ü teslîme mezbûr Ali Ağa’ya tenbîh olunmak matlûbumdur dedikde gıbbe’s-suâl mezbûr Ali Ağa cevâbında husûs-ı mezbûr için ancak müdde‘î-i mezbûrdan bir minalı akreb sâ‘at ve bir billûr zarflı sâ‘at ahz u kabz edip hâlâ yedimde mevcûddur deyü ikrâr lâkin meblağayn-ı mezbûreyni bi’l-külliye inkâr edicek müdde‘î-i mezbûrdan ziyâde müdde‘âsına mutâbıka beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka müdde‘î-i merkūm Süleyman Ağa’dan husûs-ı merkūm için mârrü’z-zikr sâ‘atlerden mâ‘adâ altı yüz guruş olmak üzere on altı bin Mısrî para ve seksen dokuz eşrefî altın ahz u kabz etmeyip ol vechile meblağayn-ı mezbûreynin reddi üzerine lâzım gelmediğine mezbûr Ali Ağa’ya yemîn teklîf olundukda ol dahi hasbe’l-mesûl yemîn billâhi te‘âlâ etmeğin mûcebiyle zikrolunan iki sâ‘ati müdde‘î-i mezbûra redd ü teslîme mezbûr Ali Ağa’ya tenbîh ve meblağayn-ı mezbûreyn mütâlebesi’çün müdde‘î-i mezbûr Süleyman Ağa bilâ-beyyine bî-vech mu‘ârazadan men‘ olundukdan sonra mezbûr Süleyman Ağa meclis-i şer‘de mezkûr Ali Ağa mahzarında ikrâr ve takrîr-i kelâm edip ânifen bana teslîmine tenbîh olunan sâlifü’z-zikr minalı akreb sâ‘at ve billûr zarflı akreb sâ‘atin aynlarını mezbûr Ali Ağa bana redd ü teslîm ve ben dahi ahz u kabz eyledim dedikde gıbbe’t-tasdîkı’ş-şer‘ mâ vaka‘a bi’t-taleb ketb olundu. Fi’l-yevmi’r-râbi‘ aşer min-Cumâdelâhire li-sene seb‘a ve mie ve elf. Şuhûdü’l-hâl: Hâfız Mehmed Efendi el-kādî bi-Kilis sâbıkā, Ahmed Çavuş b. el-Hâc Mustafa, Mehmed Çavuş b. Ali, Mehmed Çavuş b. Abdurrahman, Mustafa Çelebi b. el-Hâc Ahmed, Hattât Mehmed Ağa b. ( ), İsmail Efendi el-kâtib, el-Hâc İbrahim b. Mustafa, el-Hâc Mehmed b. Süleyman, Ömer Ağa b. ( ), Mustafa Çelebi b. Şaban, el-Hâc Süleyman b. Mustafa ve gayruhum mine’l-huzzâr. Yevm-i isneyn fî 18 min-Cumâdelâhire sene 1107 Yevm-i sülâsâ fî 19 min-Cumâdelâhire sene 1107 Yevm-i erba‘a fî 20 min-Cumâdelâhire sene 1107 Yevmü’l-hamîs fî 21 min-Cumâdelâhire sene 1107