İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 75 Hüküm no: 6 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamer Hatun bt. Abdullah’ın vakfettiği arsa ve üzerindeki mülk binanın tasarrufunun Halil b. Derviş’e verildiği Merhûme Kamer Hatun bt. Abdullah nâm sahibetü’l-hayrın süknâsı külle yevm altı İhlâs-ı şerîf tilâvet etmek üzere bir recüle meşrûta vakfı olup mahmiye-i İstanbul’da Nevbethâne mahallesinde vâki‘ bir tarafdan merhûm Müsâhib Mustafa Paşa veresesi mülkleri ve bir tarafdan Hadîka-i Hâssa imâmına meşrûta vakf menzil ve bir tarafdan Mehmed Çelebi mülkü ve bir tarafdan tarîk-i âm ile mahdûd dâhiliyede iki fevkānî oda ve sofa ve kenîf ve hâriciyede bir bâb fevkānî oda ve sofa ve kenîfi müştemil menzile mukaddemâ tevcîh-i hâkimü’ş-şer‘le mutasarrıf olan Ali Efendi b. Mustafa menzil-i mezbûrun ebniye-i mevcûdesini izn-i mütevellî ve mâlıyla mülkü olmak üzere ba‘de’l-binâ mezbûr Ali Efendi fevt olup verâseti zevcesi Ümmügülsüm bt. Abdullah nâm hatun ile sulbî oğlu Mustafa Çelebi’ye münhasıra olmağla ebniye-i mezbûre merkūmâna ırsen isâbet ve arsa-i mevkūfe-i mezkûre mezbûr Mustafa Çelebi’ye kıbel-i şer‘den tevcîh olundukdan sonra mezbûr Mustafa Çelebi dahi fevt olup verâseti vâlidesi mezbûre Ümmügülsüm ile li-ümmin er karındaşı Mehmed b. Halil’e münhasıra olmağla ebniye-i memlûke-i mezbûrede olan hisse-i şâyi‘ası vâlidesi mezbûre ile karındaşı merkūm Mehmed’e ırsen isâbet edip ve arsa-i mevkūfe-i mezbûre kıbel-i şer‘den es-Seyyid Ali Efendi b. Mustafa nâm kimesneye tevcîh olundukda mezbûrânın ebniye-i memlûkelerinin kıymetlerini bir vechile edâya iktidârı olmayıp ve arsa-i mevkūfe-i mezbûrenin müstakillen tasarrufu mümkün olmamağla mezbûr es-Seyyid Ali Efendi dahi arsa-i mezbûreden kasr-ı yed etmekle süknâ-yı arsa-i mevkūfe-i mezbûre mahlûle olmağın bundan akdem mezbûr Mehmed her vechile müstehak olmağla arsa-i mezbûrenin süknâsı ber-mûceb-i şart-ı vâkıfe mezbûr Mehmed’e tevcîh olunmağın mezbûr Mehmed ber-vech-i muharrer mutasarrıf iken fevt olmağla süknâ-yı arsa-i mezbûre işbu bâ‘isü’l-kitâb mezbûr Mehmed’in babası mezbûr Halil b. Derviş her vechile mahall ü müstehak olduğunu zeyl-i kitâbda muharrerü’l-esâmî Müslimîn ihbâr etmeleriyle arsa-i mezbûrenin süknâsı ber-mûceb-i şart-ı vâkıfe kıbel-i şer‘den mezbûr Halil’e tevcîh olunup tasarrufi’çün işbu vesîka bi’t-taleb ketb olundu. Fi’l-yevmi’s-sâdis aşer min-Cumâdelâhire li-sene seb‘a ve mie ve elf. Şuhûdü’l-hâl: İmâm Abdullah Efendi b. Osman, Osman Ağa b. İlyas, Hüseyin Ağa b. İbrahim, Hasan Çelebi b. Mustafa, Mehmed Çelebi b. Mustafa, Seyfi Çelebi b. Abdullah, Şaban Çelebi b. Mehmed, Mehmed Efendi b. İbrahim el-müezzin, İbrahim Çelebi b. Ahmed, Mehmed Çelebi b. İdris ve gayruhum. Yevm-i Cum‘a fî 22 min-Cumâdelâhire sene 1107