İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 76 Hüküm no: 7 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Trablusşam Valisi Hamza Paşa’nın oğlu Yusuf Bey için Mısır Azebân Ocağı’ndan Ahmed Efendi b. Hüseyin Ağa’nın vekil tayin edildiği Trablusşam vâlîsi oldukdan sonra bundan akdem vedâ‘-ı âlem-i fânî eden merhûm Hamza Paşa’nın sulbî oğlu olup hâlâ on iki yaşında olan işbu hazır bi’l-meclis Yusuf Bey nâm sagīrin vasîyy-i şer‘îsi Hürrem Efendi b. Salih b. Mehmed meclis-i şer‘-i şerîf-i enverde bi’l-vesâye takrîr-i kelâm ve ta‘bîr ani’l-merâm edip hatt-ı hümâyûn-ı şevket-makrûn ile mu‘anven yedimde olan işbu emr-i şerîf-i cihân-mutâ‘ nâtık olduğu üzere diyâr-ı Mısriye’de Vilâyet-i Arabiye’de vâki‘ Sanadfa? nâm karyede vasîsi olduğum işbu sagīr-i mezbûr Yusuf Bey’in taht-ı tasarrufunda olan rub‘ hisseyi mukaddemâ Mısr-ı Kāhire vâlîsi olan müteveffâ Ahmed Paşa kethudâsı Ali Kethudâ kendi karındaşı Hüseyin nâm kimesne üzerine etdirmekle sagīr-i mezbûrun karye-i merkūmede olan mârrü’z-zikr rub‘ hissesine merkūm Hüseyin bi-gayr-ı hakkın fuzûlen vâzı‘u’l-yed olmağın hâlâ zikrolunan rub‘ hisseyi merkūm Hüseyin’den taleb ve da‘vâ ve zabt u tasarrufa mahrûse-i Mısır’da Azebân Ocağı’ndan olup Sipâh Sûku’nda sâkin Ahmed Efendi b. Hüseyin Ağa nâm kimesneyi kabûlüne mevkūfe vekâlet ile tarafımdan vekîl ve nâib-i menâb nasb u ta‘yîn eyledim dedikde <> mâ hüve’l-vâki‘ bi’t-taleb ketb olundu. Fi’l-yevmi’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Hüseyin Ağa b. Abdullah gönüllüyân, Mehmed Ağa b. Abdullah an Çerâkise?, el-Hâc Salih b. Mustafa müstahfızân, Ömer Ağa b. Abdullah. Yevm-i sebt fî 23 min-Cumâdelâhire li-sene 1107