İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 76 Hüküm no: 8 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giritli Süleyman b. İyad’ın alacaklı olduğu Vezirazam Ali Paşa’nın kethudası Ahmed Efendi b. Mustafa ile sulh oldukları Cezîre-i Girid’de merhûm ve mağfûrun-leh Sultân İbrahim Han mahallesi ahâlîsinden olup mahmiye-i İstanbul’da müsâfiren sâkin Süleyman Ağa b. İyâd meclis-i şer‘-i şerîf-i enverde merhûm Vezîriazam-ı sâbık Ali Paşa’nın hayatında haremi kethudâsı olan fahrü’l-eşbâh Ahmed Efendi b. Mustafa tarafından husûs-ı âti’l-beyâna vekîl olduğu Mustafa Çelebi b. Hüseyin ve Süleyman Çelebi b. Ahmed nâm kimesneler şehâdetleriyle şer‘an sâbit olan es-Seyyid Ali Ağa b. <> Mustafa mahzarında ikrâr-ı tâm ve takrîr-i kelâm edip vekîl-i mezbûrun müvekkili merkūm Ahmed Efendi vezîr-i müşârün-ileyhin hayatında bir husûs için benim eşyâ-i memlûkemden yüz vakıyye revgan-ı sâde ve yüz vakıyye asel ve elli vakıyye yağ-ı zeytinî ve elli vakıyye revgan-ı zeyt yağımı bi-gayr-ı hakkın ahz u kabz ve istihlâk etmekle bundan akdem mezbûr Ahmed Efendi’den eşyâ-i mezbûrenin kıymetleri olan cem‘an altı bin yedi yüz elli akçe taleb ve da‘vâ etdiğimde [beynimizde] ba‘de’l-münâza‘a muslihûn tavassut edip [3b] da‘vâ-yı mezkûremden vekîl-i mezbûr benimle beş bin yedi yüz elli akçe üzerine sulh oldukda ben dahi sulh-ı mezbûru kabûl ve bedel-i sulh olan meblağ-ı mezbûr beş bin yedi yüz elli akçeyi vekîl-i mezbûr yedinden bi’t-tamam ahz u kabz ve istifâ eyledim ba‘de’l-yevm husûs-ı mezkûra ve ziyâde müdde‘âm olan bin akçeye müte‘allika âmme-i da‘vâdan mezbûr Ahmed Efendi’nin ve etbâ‘ından işbu hazır bi’l-meclis Ahmed Ağa b. Mustafa’nın zimmetlerini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Cumâdelâhire li-sene seb‘a ve mie ve elf. Şuhûdü’l-hâl: Mustafa Çelebi b. Hüseyin, Şaban Efendi b. Ahmed, İbrahim Çelebi b. Ahmed, Mustafa b. Şaban, Ahmed b. Ahmed, Mustafa b. Şaban, Receb b. Süleyman. Yevm-i ahad fî 24 min-Cumâdelâhire li-sene 1107