İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 77 Hüküm no: 9 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hasan Efendi b. Veliyüddin’in, Medine-i Münevvere Kadısı Seyyid Halil Efendi’de kalan alacak davasında varislerle sulh olduğu Mahmiye-i İstanbul’da Hoca Veyis mahallesi sükkânından olup hâlâ Ma‘den Mukāta‘ası halîfesi olan umdetü erbâbü’t-tahrîr ve’l-kalem el-Hâc Hasan Efendi b. Veliyüddin meclis-i şer‘-i şerîf-i enverde mahmiye-i mezbûrede Âbid Çelebi mahallesi sükkânından olup Medîne-i Münevvere şerefehallâhu te‘âlâ kadısı oldukdan sonra düyûnu terekesinden ezyed olduğu hâlde vedâ‘-ı âlem-i fânî eden merhûm es-Seyyid Halil Efendi b. es-Seyyid Mehmed b. es-Seyyid Abdülcabbar’ın verâseti zevce-i metrûkesi Hâce Afife Hatun bt. Abdullah ile sulbî kebîr oğulları umdetü’l-müderrisîni’l-kirâm es-Seyyid Mehmed Emin Efendi [ve] umdetü’l-mehâdîmü’l-fihâm es-Seyyid Abdülcabbar Efendi’ye ve sulbiye kebîre kızları Şerife Emetullah ve Şerife Ümmühani nâm hatunlara münhasıra olduğu şer‘an zâhir ve müte‘ayyen oldukdan sonra mezbûrân es-Seyyid Mehmed Emin Efendi ve es-Seyyid Abdülcabbar Efendi mahzarlarında ikrâr-ı tâm ve takrîr-i kelâm edip merhûm-ı mezbûr es-Seyyid Halil Efendi zimmetinde cihet-i karz-ı şer‘îden bir defa beş yüz guruş ve bir defa yüz elli guruş ki cem‘an altı yüz elli guruş hakkım olup kable’l-edâ zimmetinde iken ber-vech-i muharrer düyûnu terekesinden ezyed olduğu hâlde fevt olup terekesi beyne’l-guremâ taksîm olundukda benim hisseme ancak yüz elli guruş isâbet ve ahz u kabz edip beş yüz guruş hakkım bâkī kalmışidi. Lâkin meblağ-ı bâkī-i mezbûrdan ezyed müteveffâ-yı mezbûrun âhar terekesini siz ahz ü ihfâ eylediğiniz deyü meblağ-ı bâkī-i merkūm beş yüz guruşu mezbûrân es-Seyyid Mehmed Efendi ve es-Seyyid Abdülcabbar Efendi’den taleb ve da‘vâ eylediğimde beynimizde ba‘de’l-münâza‘a muslihûn tavassut edip da‘vâ-yı mezbûremden beynimizde yüz altmış guruş üzerine akd-i müsâlaha olundukda ben dahi sulh-ı mezbûru kabûl ve bedel-i sulh-ı mezbûrun altmış guruşunu yedlerinden ahz u kabz edip mâ‘adâsı olan yüz guruşu târih-i kitâbdan üç yüz gün tamamına değin bi’t-taleb tecîl eylediğimde onlar dahi kabûl ve meblağ-ı müeccel-i mezbûrdan herbiri âharın zimmetine lâzım gelen meblağa emr ve kabûlü hâviye kefâlet-i sahîha ile kefîl olmağın ba‘de’l-yevm meblağ-ı müeccel-i mezbûrdan mâ‘adâ meblağ-ı mezkûre ve bi’l-cümle merhûm-ı merkūm ile ile’l-vefât beynimizde cereyân eden ahz ü i‘tâya müte‘allika âmme-i da‘vâdan mezbûrân es-Seyyid Mehmed Emin Efendi ve es-Seyyid Abdülcabbar Efendi ile mezbûrât Hâcce Afife ve Şerife Emetullah ve Şerife Ümmühani’nin zimmetlerini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Ali Efendi b. Mustafa, Mustafa Bey el-Bevvâb, Ali Çelebi b. Veli, Receb Efendi b. el-Hâc Mustafa, Süleyman b. Mustafa, İbrahim b. Muslu, Hâfız Mehmed Efendi Tezkire[î] Osman Paşa, Zekeriya Çelebi b. Mustafa, Mehmed Çelebi b. Hamza, İbrahim Çelebi b. Ahmed ve gayruhum. Yevm-i [i]sneyn fî 25 min-Cumâdelâhire li-sene 1107