İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 78 Hüküm no: 10 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İsmail b. Hacı Rıdvan’ın vakfettiği paranın vakfın mütevellisi Hacı Mehmed Çelebi b. Mahmud’ateslim edildiği Mahmiye-i İstanbul’da Âşık Paşa mahallesinde sâkin iken bundan akdem vefât eden el-Hâc İsmail b. el-Hâc Rıdvan nâm sahibü’l-hayrın ber-vech-i âtî nukūduna bi’l-fi‘il mütevellî olan el-Hâc Mehmed Çelebi b. Mahmud meclis-i şer‘-i şerîf-i enverde fahrü’l-müderrisîn es-Seyyid Mehmed Emin Efendi b. el-merhûm es-Seyyid Hâşim Mehmed Efendi mahzarında bi’t-tevliye ikrâr-ı tâm ve takrîr-i kelâm edip müteveffâ-yı mezbûr el-Hâc İsmail hâl-i hayatında ve kemâl-i akl [ü] sıhhatinde işbu mezbûr es-Seyyid Mehmed Emin Efendi’nin yedine verdiği hüccet-i şer‘iye nâtıka olduğu üzere zimem-i nâsda olan min-haysü’l-mecmû‘ bin altı yüz elli sekiz guruş hakkım bi emrillâhi te‘âlâ fevt olduğumda ahz u kabz olunup meblağ-ı mezbûrdan evvelen yüz guruş techîz ve tekfînim ve sünnet-i seniyye üzere sâir levâzım-ı defnime harc u sarf olunup mâ‘adâdan on beş guruş düyûn-ı müteferrika ashâbına verile ve meblağ-ı bâkīden para üç akçe hesâbı üzere kırk bin sağ akçe ifrâz olunup işbu hazır bi’l-meclis umdetü’l-ulemâi’l-izâm efdalü’l-fudalâi’l-fihâm sa‘âdetlü La‘lîzâde eş-Şeyh Mehmed Efendi hazretlerinin re’y buyurdukları vech üzere meblağ-ı merkūm vakf ü habsolundukdan sonra meblağ-ı mezbûr yed-i mütevellî ile sâl be-sâl alâ vechi’l-helâl onu on bir hesâbı üzere istirbâh ve istiğlâl olunup hâsıl olan nemâsından beher sene kapamalar iştirâ ve fukarâya iksâ oluna deyü vasiyyet edip tenfîzine mezbûr es-Seyyid Mehmed Emin Efendi’yi tarafından vasîyy-i muhtâr nasb u ta‘yîn eyledikde ol dahi ber-vech-i muharrer vesâyet-i mezbûreyi ba‘de’l-kabûl mezbûr el-Hâc İsmail musırrân fevt olduğundan sonra meblağ-ı mezbûr ber-vech-i muharrer işbu yedimde olan vakfiye nâtık olduğu üzere müşârün-ileyh hazretlerinin re’yleri üzere vakf olunup mezbûr es-Seyyid Mehmed Emin Efendi [4a] yedinde kalmışidi. El-hâletü-hâzihî meblağ-ı mezbûr kırk bin sağ akçeyi mezbûr es-Seyyid Mehmed Emin Efendi bana bi’t-tamam def‘ u teslîm ben dahi bi’t-tevliye yedinden ahz u kabz eyledim meblağ-ı mezbûrdan mezbûrun yedinde bir akçe kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Muhzırlar Kethudâsı el-Hâc Mustafa Efendi, İbrahim Çelebi b. Ahmed Tahtacı, Küçük İbrahim Çelebi b. Ahmed, Mustafa b. Süleyman, Receb b. Süleyman, Ahmed b. Ahmed, Ali Çelebi b. Bali, Mehmed Çelebi b. Ahmed.