İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 79 Hüküm no: 11 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köle olduğu iddia edilen Ahmed’in hür olduğunu ispat ettiği İşbu orta boylu açık kaşlı sarı elâ gözlü Ahmed nâm şâbb-ı emred meclis-i şer‘-i şerîf-i enverde vilâyet-i Anadolu’da Boyabad kazâsına tâbi‘ Şeyhköyü nâm karyede sâkin iken bundan akdem vefât eden Mehmed Efendi b. Ali’nin verâseti zevce-i metrûkesi Hatice bt. Derviş nâm hatun ile sulbî kebîr oğulları Mustafa ve Osman ve Ali’ye münhasıra olduğu mütehakkık oldukdan sonra kendi tarafından asıl ve mezbûrûn taraflarından husûs-ı âti’l-beyâna vekîl-i müseccelleri olan mezbûr Ali mahzarında üzerine da‘vâ ve takrîr-i kelâm edip ben vilâyet-i mezbûrda Ösek kurbünde Valpude nâm kasaba ahâlîsinden olup hürrü’l-asl olan Ali’nin firâşından hâsıl ve zevcesi hürretü’l-asl olan Ayşe’den mütevellid hürrü’l-asl iken mezbûr Ali ve sâir verese-i mezbûrûn müteveffâ-yı mezbûrun terekesi olmak zu‘muyla bana bi-gayr-ı hakkın vaz‘-ı yed etmeleriyle suâl olunup kasr-ı yedlerine tenbîh ve sebîlim tahliye olunmak matlûbumdur dedikde gıbbe’s-suâl mezbûr Ali cevâbında mevsûf-ı mezbûru babam müteveffâ-yı mezbûr hayatında Türkmen Ali nâm kimesneden altmış guruş semen-i medfû‘a iştirâ ve kabz edip ba‘de vefâtihî bize intikāl etmekle vaz‘-ı yed ederiz ber-vech-i muharrer hür olduğu ma‘lûmumuz değildir deyicek müdde‘î-i mezbûrdan müdde‘âsını mübeyyene beyyine taleb olundukda udûl-i Müslimînden olup Dergâh-ı âlî yeniçerilerinin elli üçüncü bölük yoldaşlarından Mehmed Beşe b. Ahmed ve dördüncü cemâ‘at yoldaşlarından Mustafa Beşe b. Veli nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu mevsûf-ı mezbûr Ahmed zikrolunan Ösek kurbünde Valpude nâm kasaba ahâlîsinden olup hürrü’l-asl olan mezbûr Ali’nin firâşından hâsıl ve zevcesi hürretü’l-asl olan mezbûre Ayşe’den mütevellid hürrü’l-asldır biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûrun ber-vech-i muharrer hürriyetine ba‘de’l-hükm mezbûr Ali’nin ve müvekkillerinin mevsûf-ı mezbûrdan kasr-ı yedine tenbîh olunup sebîli tahliye olunmağın mâ hüve’l-vaka‘a bi’t-taleb ketb olundu. Fi’l-yevmi’s-sâmin aşer min-Cumâdelâhire li-sene seb‘a ve mie ve elf. Şuhûdü’l-hâl: Ebûbekir Ağa b. İbrahim, Hüseyin Ağa b. Mehmed, Mustafa b. Mustafa, Mehmed Bey b. Mahmud, Ahmed b. Mehmed. Yevm-i sülâsâ fî 26 min-Cumâdelâhire li-sene 1107