İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 80 Hüküm no: 12 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim b. Abdullah’ın, kiracısı olduğu Solak Mahmud Çelebi’nin vakfı olan evin yanması üzerine inşaatına yaptığı masrafların tespit edildiği Husûs-ı âti’z-zikrin mahâllinde keşf ve tahrîri iltimâs olunmağın savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Dede Mehmed Halîfe b. İsmail ve Ahmed Halîfe b. Mustafa ile mahmiye-i İstanbul’da Çavuş Mescidi mahallesinde vâki‘ merhûm Solak Mahmud Çelebi nâm kimesnenin vakfı ve gallesi mahmiye-i mezbûrede Sadi Çelebi mahallesi avârızına mevkūfe olup bir tarafdan ba‘zen Râbia Hatun ve ba‘zen Sâdık nâm kimesne ve ba‘zen Silâhşör zevcesi menzilleri ve bir tarafdan yine vâkıf-ı mezbûrun âhar vakfı ve bir tarafdan tarîk-i âm ile mahdûd menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i mübîn eylediğinde menzil-i mezbûre ancak icâre-i müeccele-i ma‘lûme ile mutasarrıf olan işbu bâ‘isü’l-kitâb el-Hâc İbrahim b. Abdullah nâm kimesne meclis-i ma‘kūd-ı mezbûrda menzil-i mezbûrun meşrûtiyyet üzere mütevellîsi olan Mehmed Çelebi b. Abdullah mahzarında takrîr-i kelâm ve bast-ı merâm edip menzil-i mahdûd-ı mezbûr ber-vech-i mübeyyen icâre-i müeccele-i ma‘lûme ile tasarrufumda iken bin yüz beş senesinde vâki‘ harîkde ebniyesi muhterika olup cânib-i vakfda müceddeden binâya müsâ‘ade olmamağın kendi mâlım ile binâ ve masrûfum olan meblağı yine menzil-i mezbûrun icâresinden istifâ etmek üzere mütevellî-i mezbûr bana izn vermekle ben dahi enkāz-ı mevcûdesin kıbel-i şer‘den keşf ve hüccet olundukdan sonra işbu bir bâb fevkānî oda ve bir sofa ve bir dehliz ve bir bâb tahtânî oda ve bir kenîf binâ etmişidim. Hâlâ keşf ve masrûfum tahmîn ve hüccet olunmak matlûbumdur dedikde gıbbe’t-tasdîkı’ş-şer‘î mi‘mârân-ı mezbûrân menzil-i mezbûru bi’l-muvâcehe keşf ve mesâha eylediklerinde tûlen on üç buçuk ve arzen on bi-hesâbı terbî‘î yüz otuz beş zirâ‘ sakf zirâ‘ı ellişer akçeden altı bin yedi yüz elli akçe ve yine tûlen on iki ve arzen altı buçuk bi-hesâbı mezbûr yetmiş sekiz zirâ‘ çam tahtası tavan zirâ‘ı otuzar akçeden iki bin [4b] üç yüz kırk akçe ve bi-hesâbı mezbûr seksen dört zirâ‘ ağa tahtası döşeme zirâ‘ı otuz beşer akçeden iki bin dokuz yüz kırk akçe ve bi-hesâbı mezbûr yüz on iki zirâ‘ tarafeyni sıvalı dolma duvar zirâ‘ı kırkar akçeden dört bin dört yüz seksen akçe ve bi-hesâbı mezbûr kırk sekiz zirâ‘ tahta perde zirâ‘ı yirmi beşer akçeden bin iki yüz akçe ve dehlizde vâki‘ sekiz aded dolab direği herbiri otuzar akçeden iki yüz kırk akçe ve bir geçme yük yeri ma‘a dolab sekiz yüz akçe ve bir ocak beş yüz akçe ve kadden bir zirâ‘ yedi aded cam duvar-ı rengâmîz herbiri yetmişer akçeden dört yüz doksan akçe ve üç aded sandık dolab herbiri ikişer yüz ellişer akçeden yedi yüz elli akçe ve dört aded ağaç demirli pencere yüz ellişer akçeden altı yüz akçe ve bir kebîr topaç direk ma‘a başlık üç yüz akçe ve bir oda kapısı iki yüz akçe ve on bir basamak bir nerdübân üç yüz elli akçe ve tahtânîde vâki‘ bi-hesâbı mezbûr otuz bir zirâ‘ tahta perde zirâ‘ı yirmi beşer akçeden yedi yüz yetmiş beş akçe ve bir ocak üç yüz akçe bi-hesâbı mezbûr kırk dokuz zirâ‘ dolma duvar zirâ‘ı kırkar akçeden bin dokuz yüz altmış akçe ve iki sagīr cam duvar yüz akçe ve bir ağaç demirli pencere iki yüz elli akçeden dört aded raf seksen akçe ve bi-hesâbı mezbûr yirmi iki zirâ‘ tahta döşeme zirâ‘ı otuzar akçeden altı yüz akçe ve bir oda kapısı yüz elli akçeden bi-hesâbı mezbûr doksan üç zirâ‘ taş duvar zirâ‘ı yetmişer akçeden altı bin beş yüz on akçe ve bi-hesâbı mezbûr yirmi beş zirâ‘ kerpiç duvar zirâ‘ı altmışar akçeden bin beş yüz akçe ve bi-hisâb-ı mezbûr on beş zirâ‘ sakf-ı duvar zirâ‘ı yirmi beşer akçeden üç yüz yetmiş beş akçe ve bir tahta kenîf ma‘a sakf sekiz yüz akçe ve bi-hesâbı mezbûr otuz bir zirâ‘ sed duvarı zirâ‘ı ellişer akçeden bin beş yüz elli akçe ve bir Arabî sokak kapısı ma‘a kebîr frengî kilid bin iki yüz akçe ki min-haysü’l-mecmû‘ otuz sekiz bin seksen akçe ile ancak olur noksan ile olmak mümkün değildir deyü mi‘mârân-ı mezbûrân ma‘a’l-Müslimîni’l-mezkûrîn icmâ‘ u ittifâk eylediklerinden sonra ber-mûceb-i hüccet-i keşf menzil-i mezbûrun enkāz-ı mevcûdesinin kıymet-i şer‘iyesi olan iki bin iki yüz akçe ile menzil-i mezbûru kable’l-harîk mezbûr el-Hâc İbrahim zimmetinde müctemi‘ ve deyn olan on bin akçe ki min-haysü’l-mecmû‘ on iki bin iki yüz akçe meblağ-ı mezbûr otuz sekiz bin seksen akçeden ihrâc olundukda mezbûr el-Hâc İbrahim’in masrûfu ancak yirmi beş bin sekiz yüz seksen akçe bâkī kaldığını mevlânâ-yı mezbûr mahâllinde tahrîr ve ma‘an irsâl olunan Ali Efendi b. Mustafa ve İbrahim b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Cumâdelâhire li-sene seb‘a ve mie ve elf min-hicreti men lehu’l-izzü ve’ş-şeref. Şuhûdü’l-hâl: el-Hâc Fazlullah Çelebi b. Hasan, Hamza Beşe b. Mehmed, İbrahim Çelebi b. Mehmed, Hüseyin Odabaşı b. Mehmed, İvaz Beşe b. Abdullah, Mustafa Çelebi b. Mehmed, Hüseyin Beşe b. Abdullah. Yevm-i erba‘a fî 27 min-Cumâdelâhire li-sene 1107