İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 82 Hüküm no: 13 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah ve Belkıs bt. Abdullah’ın kiracı oldukları Kazganî Sadi mahallesindeki vakıf evin inşaatına yaptıkları masrafların tespit edildiği Zikri âtî menzilin mahâllinde keşf ve tahrîri bâbında buyruldu-yı şerîf vârid olmağın imtisâlen-leh savb-ı şer‘den keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Dede Mehmed Halîfe b. İsmail ve Ahmed Halîfe b. Mustafa ile mahmiye-i İstanbul’da Kazganî Sadi mahallesinde vâki‘ gallesi yine mahalle-i mezbûre müezzinine mevkūfe Bali Efendi nâm kimesnenin vakfı olup bir tarafdan Mustafa Çelebi b. Hasan ve bir tarafdan Abdüllatif Efendi ve bir tarafdan el-Hâc Mehmed menzilleri ve bir tarafdan tarîk-i âm ile mahdûd menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde menzil-i mezbûrun bi’l-icâreteyni’l-ma‘lûmeteyn mutasarrıfeleri olan işbu bâ‘ise[tü’l]-kitâb Ayşe bt. Abdullah ve Belkıs bt. Abdullah nâm hatunlar taraflarından husûs-ı âti’z-zikre vekîl-i şer‘îleri olan Hüseyin Çelebi b. Abdullah nâm kimesne meclis-i ma‘kūd-ı mezbûrda menzil-i mezbûrun bi’l-fi‘il mütevellîsi olan Müezzin İbrahim Çelebi b. el-Hâc Mehmed mahzarında bi’l-vekâle takrîr-i kelâm edip menzil-i mahdûd-ı mezbûrun ebniyesi bin yüz beş senesinde vâki‘ harîkde bi’l-külliye muhterika olup arsa-i sırfa kalmağın cânib-i vakf-ı mezbûrda binâya müsâ‘ade olmayıp ve müeccelesine mahsûb olmak üzere binâya kimesne dahi rağbet etmeyip şöyle hâlî ve mu‘attal kalmağın bundan akdem menzil-i mezbûrun mütevellîsi olan İsmail Çelebi nâm kimesne ihdâs eyleyecekleri ebniye kendi mülkleri olmak üzere müvekkiletân-ı mezbûretân izn ve yedlerine ber-vech-i mübeyyen temessük vermekle onlar dahi kendi mâllarıyla iki bâb fevkānî oda ve bir sofa ve bir dehliz ve bir kenîf ve tahtânî bir sagīr oda ve bir kenîf ve duvarları binâ etmeleriyle hâlâ ebniye-i mezkûreleri keşf ve masrûfları tahmîn-i sahîh ve takvîm olunmak bi’l-vekâle matlûbumdur dedikde gıbbe’t-tasdîkı’ş-şer‘î mi‘mârân-ı mezbûrân menzil-i mezbûru bi’l-muvâcehe keşf ve mesâha eylediklerinde tûlen on üç buçuk ve arzen on bi-hesâbı terbî‘î yüz yetmiş beş zirâ‘ sakf zirâ‘ı ellişer akçeden sekiz bin yedi yüz elli akçe ve bi-hesâbı mezbûr otuz iki zirâ‘ çam tahtası tavan zirâ‘ otuz beşer akçeden dört bin altı yüz yirmi akçe ve bi-hesâbı mezbûr yüz otuz iki zirâ‘ tahta döşeme zirâ‘ otuz beşer akçeden dört bin altı yüz yirmi akçe ve bi-hesâbı mezbûr iki yüz sekiz zirâ‘ dolma duvar zirâ‘ kırkar akçeden sekiz bin üç yüz yirmi akçe ve iki yük yeri [5a] bin altı yüz akçe ve iki kemer kapı dört yüz akçe ve iki ocak bin akçe ve dört aded sandık-ı dolab herbiri ikişer yüz ellişer akçeden bin akçe ve üç aded ağaç demirli pencere herbiri yüz ellişer akçeden dört yüz elli akçe ve altı aded cam duvar herbiri seksener akçeden dört yüz seksen akçe ve beş aded kilidi yüz elli akçe ve beş aded tahta raf yüz akçe ve üç aded İznikmid direği yüz seksen akçe ve bi-hesâbı mezbûr yirmi zirâ‘ tahta perde zirâ‘ı yirmi beşer akçeden beş yüz akçe ve on üç basamak bir cunba nerdübân ma‘a sahn bin dört yüz akçe ve sekiz aded kebîr İznikmid direği ma‘a başlık ve kürsî taşı herbiri ikişer yüz akçeden bin altı yüz akçe ve bir fevkānî kenîf bin iki yüz akçe ve tahtânî odada vâki‘ bi-hesâbı mezbûr kırk zirâ‘ dolma duvar zirâ‘ı kırkar akçeden bin altı yüz akçe ve iki ağaç demirli pencere üç yüz akçe ve bir kebîr ocak sekiz yüz akçe ve bir kenîf altı yüz akçe ve tûlen on iki ve kadden dört buçuk bi-hesâbı mezbûr elli dört zirâ‘ taş duvar zirâ‘ı yetmişer akçeden üç bin yedi yüz seksen akçe ve bi-hesâbı mezbûr kırk zirâ‘ kerpiç bahçe duvarı zirâ‘ı ellişer akçeden iki bin akçe ve bi-hesâbı mezbûr yirmi zirâ‘ taş sed duvarı zirâ‘ı otuz akçeden altı yüz akçe ve yirmi zirâ‘ parmaklık zirâ‘ı yirmişer akçeden dört yüz akçe ve bir kümes üç yüz akçe ve altı zirâ‘ havâle perdesi zirâ‘ı yirmişer akçeden yüz yirmi akçe ve bi-hesâbı mezbûr altmış zirâ‘ sakf-ı duvar zirâ‘ı yirmi beşer akçeden bin beş yüz akçe ve bir Arabî sokak kapısı ma‘a frengî kilid bin akçe ki min-haysü’l-mecmû‘ kırk dokuz bin üç yüz yetmiş akçe ile ancak olur noksan ile mümkün değildir deyü mi‘mârân-ı mezbûrân ile Müslimûn-ı mezbûrûn icmâ‘ u ittifâk etmeğin vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Mehmed Çelebi b. İbrahim ve İbrahim b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Cumâdelâhire li-sene seb‘a ve mie ve elf. Şuhûdü’l-hâl: el-Hâc Fazlı b. Hasan, Hamza Beşe b. Mehmed, Hüseyin Odabaşı b. Abdullah, İvaz Beşe b. Abdullah, Mustafa Çelebi b. Mehmed.