İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 83 Hüküm no: 14 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bîzebân Hasan Ağa Vakfı’ndan harap olan evi mütevellî kaymakamı Süleyman Çelebi b. Hasan’ın tamirine izin verildiği Husûs-ı âti’z-zikrin mahâllinde ketb u tahrîri bâbında buyruldu-yı şerîf vârid olmağın imtisâlen-leh savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Dede Mehmed Halîfe b. İsmail ve Ahmed Halîfe b. Mustafa ile mahmiye-i İstanbul’da vâki‘ merhûm Bî-zebân Hasan Ağa vakfı müstagallâtından olup mahmiye-i mezbûre hısnı ebvâbından Balatkapısı hâricinde Karabaş mahallesinde vâki‘ lede’l-ahâlî ma‘lûmü’l-hudûd Yahûdîhâne ta‘bîr olunur menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde vakf-ı mezbûrun bi’l-fi‘il mütevellî kāimmakāmı olan işbu râfi‘u’l-kitâb el-Hâc Süleyman Çelebi b. Hasan meclis-i ma‘kūd-ı mezbûrda takrîr-i kelâm ve bast-ı merâm edip vakf-ı mezbûr müsakkafâtından olup büyût-ı adîdeyi müştemil işbu Yahûdîhâne mürûr-ı eyyâm ile harâba müşrif olup deryâ tarafında vâki‘ odaları bir vechile kābil-i süknâ olmayıp eşedd-i ihtiyâc ile ta‘mîre muhtâc olmağın hâlâ keşf ve nazar olunup mal-ı vakf-ı mezbûr ile ta‘mîre kıbel-i şer‘den bana izn verilmek matlûbumdur dedikde mi‘mârân-ı mezbûrân ma‘a’l-Müslimîni’l-mezbûr zikri sebk eden Yahûdîhâneye nazar ve keşfeylediklerinden sakfı ve duvarları ve döşemeleri ve direkleri ve sâir nice mevâzi‘i müşrif-i harâb olduğundan mâ‘adâ deryâ tarafında tûlen on dokuz zirâ‘ mahalli sol tarafına bir zirâ‘ mâil olup bir vechile kābil-i süknâ olmayıp eşedd-i ihtiyâc ile ta‘mîr ü termîme muhtâc olduğu lede’ş-şer‘ zâhir ve nümâyân olup bir müddet dahi ta‘mîr olunmaz ise bi’l-külliye münhedim olması emr ve mukarrer ve vakf-ı mezbûra küllî zarar lâzım gelir deyü herbiri icmâ‘ u ittifâk ve ihbâr eylediklerinde vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mârrü’z-zikr Yahûdîhânenin mevâzi‘-i mezkûresini ve sâir cüz’î ve küllî lâzım gelen imâret ve meremmetini mal-ı vakf-ı mezbûr ile görmeğe ve lede’l-iktizâ istidâneye ve inde’z-zafer vakfa rücû‘a kāimmakām-ı mezbûr el-Hâc Süleyman Çelebi’ye kıbel-i şer‘den izn verilmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Cumâdelâhire li-sene seb‘a ve mie ve elf. Şuhûdü’l-hâl: Abdülkadir Efendi el-imâm, Ahmed Efendi b. Muslu, el-Hâc Ahmed b. Ali, el-Hâc Ali Efendi b. Mustafa, Hasan Çelebi [b.] Mahmud.