İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 90 Hüküm no: 21 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Şaban ile Ömer Ağa b. Abdullah’ın alacak hususunda birbirlerinin zimmetlerini ibra ettikleri Mahmiye-i İstanbul’da Kebeciler hânında sâkin Mehmed Çelebi b. Şaban nâm kimesne meclis-i şer‘-i şerîf-i enverde yine hân-ı mezbûrda sâkin el-Hâc Ömer Ağa b. Abdullah mahzarında ikrâr-ı tâm ve takrîr-i kelâm edip ben ücret ile hidmet eder makūlesinden olmağla mezbûrun talebiyle ücret kavlinsiz kendiye iki sene hidmet etmekle ecr-i mislimi mezbûr el-Hâc Ömer Ağa’dan taleb ve da‘vâ eylediğimde ol dahi husûs-ı mezbûru inkâr eylediğinden mâ‘adâ bi-tarîkı’l-mudârebe sana def‘ u teslîm eylediğim iki yüz guruş asıl mâl ve fâidesinden benim hisseme isâbet eden yirmi beş guruş ki cem‘an iki yüz yirmi beş guruşun yüz altmış guruşu mukābelesinde yüz yirmi top Kastamonu bezi ve iki guruş kıymetli asel ve iki guruş kıymetli sabun ve bir guruş hammâliye ve bir guruş kıymetli mest ve papuç bana def‘ u teslîm edip bâkī elli dokuz guruşu kendi mesârifine sarfla istihlâk eyledin deyü meblağ-ı bâkī-i mezbûru benden taleb ve da‘vâ eyledikde beynimizde münâza‘ât-ı kesîre cereyân etmişidi. El-hâletü-hâzihî ben müdde‘âm olan sâlifü’z-zikr iki senelik ecr-i mislime ve bi’l-cümle beynimizde cereyân eden sâir ahz u i‘tâ ve mu‘âmelât-ı şettâya müte‘allika âmme-i da‘vâdan mezbûr el-Hâc Ömer Ağa ve vekîl işbu Ahmed Çelebi’nin zimmetlerini ibrâ-i âmm-ı kātı‘ü’n-nizâ‘la ibrâ ve ıskāt edip mezbûr el-Hâc Ömer Ağa dahi müdde‘âsı olan meblağ-ı mezbûra ve târih-i kitâba gelince beynimizde cereyân eden sâir hukuka müte‘allika âmme-i da‘vâdan benim zimmetimi ibrâ-i âmm-ı kātı‘ü’n-nizâ‘la ibrâ ve ıskāt eyledi. Min-ba‘d herbirimizin âhar ile vechen mine’l-vücûh da‘vâ ve nizâ‘ı kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min-şehri Recebi’l-ferd li-sene seb‘a ve mie ve elf. Şuhûdü’l-hâl: el-Hâc Ahmed b. İbrahim, Ömer Çelebi b. Mehmed, Hasan Çelebi b. Receb, Mehmed Çelebi b. Hasan, Halil b. el-Hâc Hasan, Mustafa Beşe b. Şaban, İsmail Çelebi b. Receb, Abdullah Çelebi b. Mehmed, Hasan Beşe b. Hüseyin, Mehmed Beşe b. Hasan. Yevm-i erba‘a fî 5 min-Recebi’l-ferd li-sene 1107 Yevmü’l-hamîs fî 6 min-Recebi’l-ferd li-sene 1107