İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 91 Hüküm no: 22 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çankırı’nın Perçin köylülerinin yaylak ve mezralarını Kuzyaka köylülerinin zapt ettikleri iddiasıyla açtıkları davayı ispat edemedikleri Vilâyet-i Anadolu’da Kengiri [Çankırı] sancağında Tosya kazâsına tâbi‘ Perçin nâm karye ahâlîsinden Namazcıoğlu demekle ma‘rûf İbrahim b. Mehmed ve Gül Dede demekle şehîr Receb b. Abdullah ve Saçlıoğlu Yakub b. Ahmed nâm kimesneler dîvân-ı hazret-i sadrazamîde ma‘kūd meclis-i şer‘-i şerîf-i âlîde kazâ-i mezbûra tâbi‘ Kuzyaka/Kozyaka nâm karye ahâlîsinden işbu râfi‘iyyü’l-kitâb Mehmed b. Kara Mustafa ve Mahmud Çelebi b. Ahmed mahzarlarında mârrü’z-zikr Perçin nâm karyenin bi’l-fi‘il sipâhileri olan Bî-zebân Mustafa Ağa b. Abdullah ve Kazzâzzâde Mehmed Ağa b. Ahmed asâleten ve mârrü’l-beyân Kuzyaka nâm karye sipâhisi olan Mehmed Bey b. Mehmed tarafından sâbitü’l-vekâle vekîl olan Hüseyin Bey b. ( ) hazır oldukları hâlde üzerlerine da‘vâ ve takrîr-i kelâm edip kazâ-i mezbûrda kûh-ı Ilgaz’da vâki‘ bize inmâ ile tahdîd ve tavsîfden müstağnî Saraycık ve Güzseki ve Kâfirsekisi demekle meşhûr olan yaylak ve mezrâ‘-ı mezbûrânın sâkin oldukları sâlifü’z-zikr Kuzyaka nâm karyeye ba‘îd ve bizim sâkin olduğumuz mârrü’z-zikr Perçin nâm karyeye karîb olmağla biz hayvanâtımızı zikrolunan yaylak ve mezâri‘de ra‘y murâd eylediğimizde mezbûrân Mehmed ve Mahmud mâni‘ olup kendiler bilâ-vech tasarruf ederler suâl olunup kasr-ı yedine tenbîh olunmak matlûbumuzdur dediklerinde gıbbe’s-suâl mezbûrân Mehmed ve Mahmud cevâblarında yedimizde olan sûret-i defter-i cedîd-i mufassal-ı sultânî nâtık olduğu üzere zikrolunan Saraycık ve Güzsekisi altmış akçe resm ile ve mârrü’z-zikr Kâfirsekisi on akçe resm ile iki yüz kırk seneden bu âna gelince bizim sâkin olduğumuz mârrü’l-beyân Kuzyaka karyesi ahâlîsinin kendilere mahsûs ve müstakil yaylak ve mer‘âsı olup zabt u tasarrufumuzda olmağla sinîn-i mezbûreden beri eben an ceddin hayvanâtımızı onlarda ra‘y edegelip hatta bin doksan dokuz senesi Şevvali’l-mükerrem’inin on birinci günü mârrü’z-zikr Perçin karyesi ahâlîsi zikrolunan yaylak ve mezrâ‘a bî-vech ta‘arruz etmeleriyle târih-i mezbûrda Tosya kadısı olan Ahmed Efendi huzûrunda mürâfa‘a-i şer‘ olduğumuzda zikrolunan yaylak ve mezrâ‘da mârrü’z-zikr Perçin karyesi ahâlîsinin kat‘a alâkası olmayıp bizim sâkin olduğumuz Kuzyaka karyesi ahâlîsinin vech-i meşrûh üzere mahsûs ve müstakil mer‘âsı olup sinîn-i mezbûreden beri eben an ceddin zabt u tasarrufumuzda olmağla hayvanâtımızı onlarda ra‘y edegeldiğimizi şühûd-ı udûlle muvâcehelerinde isbât etmekle mârrü’z-zikr Perçin karyesi ahâlîsi bî-vech ta‘arruzdan men‘ olunup işbu hüccet-i şer‘iye tahrîr olunmuşidi deyü herbirinin mazmûnu min-külli’l-vücûh takrîr-i meşrûhlarına muvâfık ve tuğrâ-yı garrâ-yı sultânî ile muhallâ sûret-i defter-i cedîd-i mufassal-ı sultânî ve mûmâ-ileyh Ahmed Efendi’nin imzâsıyla mümzât ve hatmiyle mahtûme ve mazmûnu müsbit hüccet-i şer‘iye ibrâz etmeleriyle feth ü kırâet ve istintâk olundukda müdde‘ûn-ı mezbûrûn ile zikrolunan sipâhilerden herbiri zikrolunan yaylak ve mezrâ‘ mârrü’z-zikr Kuzyaka karyesi ahâlîsinin mahsûs ve müstakil mer‘âsı olup sinîn-i mezbûreden [7b] herbiri eben an ceddin zabt u tasarruflarında olup hayvanâtlarını onlarda ra‘y edegelmişlerdir deyü kazıyye-i mezbûrân Mehmed ve Mahmud’un takrîr-i meşrûhları üzere olduğunu tâyi‘an ikrâr u i‘tirâf etmeğin mûcebiyle zikrolunan Perçin karyesi ahâlîsi olan müdde‘ûn-ı mezbûrûn bî-vech mu‘ârazadan men‘ olup mâ hüve’l-vâki‘ bi’t-taleb ketb olundu. Fi’l-yevmi’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem Mustafa Efendi Tezkire-i evvel, zübdetü ashâbi’t-tastîr ve’r-rakām Mehmed Efendi Tezkire-i sânî, umdetü’l-eşbâh ve’l-a‘yân Yusuf Ağa Ser-çavuşân, fahrü’l-akrân ve’l-ekfâ Muhzır ağa, umdetü’l-mevâliyyi’l-izâm Mustafa Efendi el-kādî-i bi-Tokat sâbıkā, Mustafa Efendi b. Derviş Mehmed el-kādî, el-Hâc Halil Efendi b. Mehmed, el-Hâc Mustafa Efendi b. Eyüb, Ali Beşe Ser-çukadâr.