İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 93 Hüküm no: 24 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. Defterdar Mehmed Paşa’nın Kandiye Valisi Mehmed Paşa b. Yusuf’un varisleriyle olan alacak davasında birbirlerinin zimmetlerini ibra ettikleri. Husûs-ı âti’z-zikrin mahâllinde ketb u tahrîri’çün savb-ı şer‘den bi’t-taleb irsâl olunan Ebûbekir Efendi b. el-Hâc Abdülkerim sâbıkā Dergâh-ı âlî kapıcıbaşılarından olup hâlâ cennet-mekân Firdevs-âşiyân merhûm ve mağfûrun-leh Sultân Süleyman Han aleyhi’r-rahmetü ve’r-rıdvân câmi‘-i şerîfi kurbünde sâkin umdetü’l-eşbâh Mustafa Bey b. el-merhûm Defterdâr Mehmed Paşa’nın sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr eyledikde mûmâ-ileyh Mustafa Bey meclis-i ma‘kūd-ı mezbûrda cezîre-i Kandiye vâlîsi iken bundan akdem vedâ‘-ı âlem-i fânî eden merhûm Mehmed Paşa b. Yusuf’un verâseti zevce-i metrûkesi Hatice Hatun bt. İbrahim ile sulbî kebîr oğlu umdetü’l-emâcid ve’l-ekârim Mustafa Bey’e ve sulbiye kebîre kızları Asiye Hanım ve Hacer Hanım ve Ayşe Hanım ve Fâtıma Hanım ve Râbia Hanım’a münhasıra olduğu şer‘an zâhir ve müte‘ayyen oldukdan sonra kendi tarafından asıl ve mezbûrât Hatice Hatun ve Asiye Hanım ve Hacer Hanım ve Ayşe Hanım ve Fâtıma Hanım ve Râbia Hanım taraflarından husûs-ı âti’z-zikre vekîl olduğu zâtlarını ma‘rifet-i şer‘iye ile ârifân umdetü’l-müderrisîni’l-kirâm Murad Efendi b. Ali ve Süleyman Ağa b. Mehmed şehâdetleriyle şer‘an sâbit olan mûmâ-ileyh Mustafa Bey mahzarında ikrâr-ı tâm ve takrîr-i kelâm edip merhûm-ı mûmâ-ileyh Mehmed Paşa zimmetinde işbu deyn temessüğü nâtık olduğu üzere cihet-i karz-ı şer‘îden beş bin guruş hakkım olup meblağ-ı mezbûrun beş yüz guruşunu deyn-i mezbûra kefîl olan kethudâsı Abdurrahman Ağa yedinden ahz u kabz edip dört bin beş yüz guruşunu kable’l-edâ zimmetinde iken fevt olup terekesine vâzı‘u’l-yed olmuşidin deyü meblağ-ı mezbûrun dört bin beş yüz guruşunu mûmâ-ileyh Mustafa Bey’den taleb ve da‘vâ eylediğimde ol dahi cevâbında babam mezbûrdan hayatında cezîre-i mezbûrede nakd dört bin guruş ile beş yüz guruş kıymetli bir sîm dîvân rahtı ve yedi yüz guruş kıymetli bir sırt samur kürk ve sekiz yüz guruş kıymetli bir mücevher altın sâ‘at ve elli guruş kıymetli bir mücevher altın bıçak ve iki yüz guruş kıymetli bir kalkan? sâ‘at ve seksen guruş kıymetli bir sîm kemer raht ve yüz guruş kıymetli bir Mardin perdesi ve yüz elli guruş kıymetli bir dîvân abâyisi ve iki yüz elli guruş kıymetli bir altın kuşak ve seksen guruş kıymetli bir sîm eğerini ahz u kabz ve kendi mesârifine sarfla istihlâk edip kable’l-ahz babam mezbûr Mehmed Paşa fevt olmağla zimmetinde kalmışdır deyü benden taleb ve da‘vâ etmekle beynimizde münâza‘ât-ı kesîre cereyân etmişidi. El-hâletü-hâzihî ben müdde‘âm olan meblağ-ı merkūm dört bin beş yüz guruşa ve târih-i kitâba gelince beynimizde cereyân eden sâir hukuka müte‘allika âmme-i da‘vâdan mûmâ-ileyh Mustafa Bey’in ve sâir verese-i mezbûrûnun zimmetlerini ibrâ-i âmm-ı kātı‘ü’n-nizâ‘la ibrâ ve ıskāt edip onlar dahi müdde‘âsı olan meblağ-ı mezbûr ile eşyâ-i mezbûreye ve târih-i kitâba gelince sâir hukuka müte‘allika âmme-i da‘vâdan benim zimmetimi ibrâ-i kātı‘ü’n-nizâ‘la ibrâ ve ıskāt eylediler dedikde gıbbe’t-tasdîkı’ş-şer‘î vâki‘ hâli mezbûr Ebûbekir Efendi mahâllinde tahrîr ba‘dehû ma‘an ba‘s olunan el-Hâc Süleyman Ağa b. Rıdvan ve el-Hâc Ali b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Umdetü’l-müderrisîni’l-kirâm Rodosîzâde ( ) Efendi, umdetü erbâbü’t-tahrîr ve’l-kalem reis-i sâbık Ebûbekir Efendi, es-Seyyid Ömer Efendi b. Mustafa, Mehmed Efendi b. Pîrî Ağa, Ahmed Ağa b. Ali Efendi, Mübâşir el-Hâc Süleyman Çavuş, İbrahim Ağa b. Mehmed, Mustafa b. Mehmed, Yahya b. Hasan, Süleyman b. Abdullah.