İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 95 Hüküm no: 25 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. İbrahim’in, Kürkçübaşı Süleyman Ağa vakfına ait dükkânına komşusu Yusuf b. Abdullah’ın dükkânının verdiği zararın önlenmesi. Husûs-ı âti’z-zikrin mahâllinde istimâ‘ ve tahrîri ve fasl u hasmı bâbında buyruldu-yı şerîf vârid olmağın imtisâlen-leh savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Mustafa Halîfe b. Abdülmennan ve Ali Halîfe b. Abdülmennan ile mahmiye-i İstanbul’da Kumkapı hâricinde vâki‘ merhûm Kürkçübaşı Süleyman Ağa vakfı müsakkafâtından olup bir tarafdan yine vakf-ı mezbûrdan Yusuf b. Abdullah tasarrufunda olan pazarcı dükkânı ve bir tarafdan vakf kenîfler ve iki tarafdan tarîk-i âm ile mahdûd ve pazarcı dükkânına varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde dükkân-ı mahdûd-ı mezbûra icâreteyn-i ma‘lûmeyn ile mutasarrıf olan işbu bâ‘isü’l-kitâb İbrahim Çelebi b. İbrahim meclis-i ma‘kūd-ı mezbûrda vakf-ı mezbûr mütevellîsi es-Seyyid Ömer Çelebi b. es-Seyyid Mehmed tarafından vekîl ve kâtib-i vakf-ı mezbûr Abdullah Efendi hazır olduğu hâlde mezbûr Yusuf muvâcehesinde üzerine da‘vâ ve takrîr-i kelâm edip mezbûr Yusuf’un işbu dükkânı benim dükkânım üzerine meyledip ve ebniyesi dükkânıma dayanmak ile benim dükkânımı tarîk-i âm cânibine meyletdirmekle dükkânım inhidâmına bâ‘is olup bana zarar-bîni olmağın hâlâ keşf ve nazar olunup def‘ etdirilmek matlûbumdur dedikde mi‘mârân-ı mezbûrân ile Müslimûn-ı mezbûrûn zikrolunan dükkânları bi’l-muvâcehe nazar ve keşfeylediklerinde fi’l-hakīka mezbûr Yusuf’un dükkânı üzerinde olan odasının ve sakfının müdde‘î-i mezbûrun dükkânı tarafında müstakil direkleri olmayıp müdde‘î-i mezbûrun direklerine bağalar urulup üzerlerine taban vaz‘ olunmağla müdde‘î-i mezbûrun direkleri ve dükkânı tarîk-i âm tarafına on sekiz parmak mikdârı meyledip zarar-bîni olduğu mukarrer ve muhakkak olup mezbûr Yusuf zikrolunan dükkânın müdde‘î-i mezbûr İbrahim Çelebi’nin dükkânı tarafına müceddeden müstakil direkleri vaz‘ eyleyip kendi dükkânı tabanlarını ve sakfını kendi direkleri üzerine almak ile zararı mündefi‘ olur deyü mi‘mârân-ı mezbûrân ile Müslimûn-ı merkūmûn bi’l-muvâcehe ihbâr ve ittifâk etmeleriyle mezbûr Yusuf ber-vech-i mübeyyen mahâll-i mezkûra müstakil direkleri vaz‘ eyleyip kendi dükkânı tabanlarını ve sakfın kendi direkleri üzerine almak üzere mezbûr Yusuf’a tenbîh eylediğini mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Molla Ali b. Ömer, Mustafa Beşe b. Abdullah, Bektaş Beşe b. İbrahim, Ali Çelebi b. Bektaş, el-Hâc İbrahim b. Abdullah, el-Hâc Abdurrahim b. İbrahim.