İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 105 Hüküm no: 32 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan Hanım bt. Mehmed Bey’in iki hizmetçisini gasp eden Esirci İslam Beşe b. Ali’nin esirleri iade veya bedelini ödemesi Mahrûse-i Galata’ya tâbi‘ kasaba-i Kasım’da Yeldeğirmeni mahallesinde sâkine İsmihan Hanım bt. Mehmed Bey tarafından husûs-ı âti’l-beyâna vekîl olduğu zâtı ma‘rifet-i şer‘iye [ile] ârifân olan İbrahim b. Mustafa ve Mehmed b. Fethullah nâm kimesneler şehâdetleriyle sâbit olan Mehmed Çelebi b. Abdullah nâm kimesne meclis-i şer‘-i şerîfde Esirci tâifesinden İslâm Beşe b. Ali mahzarında bi’l-vekâle üzerine da‘vâ ve takrîr-i kelâm edip mezbûr İslâm Beşe müvekkilem merkūme İsmihan Hanım’ın bundan akdem herbiri orta boylu açık kaşlı Rusiyyü’l-asl biri yüz yirmi guruş kıymetli ve biri doksan guruş kıymetli Vasil isimleriyle müsemmâ iki re’s Kazak ta‘bîr olunur gulâmlarını ahz u gasb edip hatta ber-vech-i muharrer gasbını ikrâr dahi etmekle suâl olunup mevcûd ise aynlarını müstehlek ise ba‘de’s-sübût kıymetlerini müvekkile-i mezbûreye edâ etmek üzere mezkûr İslâm Beşe’ye tenbîh olunmak matlûbumdur dedikde gıbbe’s-suâl ve’l-inkâr müdde‘î-i merkūmdan müdde‘âsını mübeyyene beyyine taleb olundukda udûl-i Müslimînden olup kasaba-i mezbûrede Kulaksız mahallesinde sâkin Mehmed b. Mustafa ve Kasımpaşa’da el-Hâc Hasan mahallesinde Mehmed b. İbrahim nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mezbûr İslâm Beşe müvekkile-i merkūme İsmihan Hanım’ın zikrolunan iki gulâmını ben gasb eyledim deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinden ba‘de’t-ta‘dîl ve’t-tezkiye şehâdetleri makbûle olmağın mârrü’z-zikr iki re’s gulâmın mevcûd ise aynlarını müstehlek ise ba‘de’s-sübût kıymetlerini merkūme hânıma edâ ve teslîme mezbûr İslâm Beşe’ye tenbîh olmağın mâ vaka‘a bi’t-taleb ketb olundu. Fî nısf-ı Zilhicceti’ş-şerîfe sene 1104 [1107] Şuhûdü’l-hâl: İbrahim Çelebi b. Ahmed, diğer İbrahim Beşe el-Muhzır, Mustafa Çelebi el-Muhzır Kasımpaşalı, Mehmed Çelebi, Ali Çelebi.